Ngaa Ginakapos Sang Hangin kag Nagaluya Ang Hangkat ni FPJ kay GMA

Prof. Jose Ma. Sison
National Democratic Front of the Philippines
Chief Political Consultant
Abril 23, 2004

Ang mga nagapanguna sa subong nga paindisanay elektoral para sa pagkapresidente amo sanday Gloria Macapagal-Arroyo (GMA), ang poderoso nga presidente sang Gubyerno sang Republika sang Pilipinas kag ang ginasiling popular nga artista sa pelikula nga si Fernando Poe Jr (FPJ).

Pareho nga mas kilala ang duha nga ini sa ila negatibong mga aspeto kag bulnerabilidad sangsa sa mga positibong kwalipikasyon nila para sa mas mataas nga katungdanan nga ila ginaagawan. Ginasalaming nila ang patibusok nga huyog sang nagaharing sistema nga naputos sa krisis.

Bulnerable si GMA sa kritisismo bangud sa iya nahimuan sa masobra tatlo ka tuig nga pagpanerbisyo. Si FPJ naman bulnerable nga gilayon ginbalibaran bilang tawo nga wala sang anuman nga intelektwal nga kahandaan kag inagihan sa pulitika para sa pwesto sang presidente.

Sa umpisa pa lang sang kampanya, ginbale-wala na sang ginatawag nga tipo ABC nga media audience si FPJ bilang masakit nga lahug sa pumuluyo. Nagapangalag-ag sila nga basi iboto siya nga presidente sang tipo D at E nga media audience bangud lang sa bulag nga pagdayaw sa iya sang masa bilang bida sa pelikula.

Pero indi dapat pakanubuon ang masang anakbalhas bilang mga wala nahibal-an. Ang matuod, sila ang pinakamaayo nga bubon sang kinaalam. Basta may yara sila sang bastante nga kahigayunan nga mabatian ang tanan nga panan-awan, napatalum nila ang ila kamuklatan bahin sa ila kaugalingon nga kahimtangan kag kinahanglanon kag makahimo sang intelihente nga mga desisyon.

Bastante na ang dalagan sang kampanya para mahibal-an sang masa sang pumuluyo nga si FPJ mas maluya indi lamang kay GMA sa halambalanon kag inagihan kundi pati sa iya suod nga abyan nga si Joseph Estrada sang ini nagdalagan sa pagkapresidente sadtong 1998.

Indi lang simple nga artista si Estrada sadto. Nakalingkod na siya bilang alkalde kag senador kag nakapungko bilang bise presidente, maayo maghambal ilabi na sang Tagalog kag madinalag-on niya nailaragway ang kaugalingon bilang "Erap para sa Mahirap."

Kon matalum nga ikumparar kay Estrada, si FPJ wala pa gid mabotohon sa anuman nga pusisyon pangpubliko kag wala nagmadinalag-on nga ilarawan ang kaugalingon bilang kampeon sang mga imol maluwas lang sa pelikula. Suplado siya, arogante kag mainit sang ulo. Masami, pagulpe-gule siya sa pagsabat sa mga pamangkot sa mga polisiya. Halos indi siya makahim-os sang paghambal sa Tagalog man o Ingles.

Masami malipatan sang mga nagapakanubo sa kaalaman sang masa nga sa bilog nga linyada pangpulitika sa Pilipinas, may yara nga mga patriyotiko kag progresibong pwersa, kalakip na ang mga rebolusyonaryo, nga nagabulig sa masang anakbalhas sang mamumugon kag mangunguma nga mahangpan ang kahimtangan sang Pilipinas kag mga isyu bahin sa ekonomya, pulitika, kultura kag iban pa.

Ang mga ginabuyagyag sang mga progresibong partido sa party list nga wala ginaunod ang programa ni FPJ nga makapabag-o sang kahimtangan sang Pilipinas. Ang pinakamalaut sini, ang mga pareho nanday Estrada kag mga Marcos kag iban pa nga madugay nga nagapamuyong kag nagalapas sa mga tawhanon nga kinamatarung ang yara sa likod niya kag nagagamit sa iya bilang dummy.

Namutikan man sang progresibong partido sa party nga maka-makinaugalingon sang mentalidad, estilo sa pagpangampanya kag pagkigrelasyon sa mga tawo ni FPJ. Ginapakita niya nga wala siya nagakinahanglan sang bulig bisan kay sin-o bangud tuman ka popular kuno siya kag sigurado nga magadaug.

Wala niya ginakilala ang kabaskog sang swing-vote sang mga progresibong partido kag wala niya ginalapitan agud makipagbuligay. Nagpabaya siya sa paghugpong bisan man lang sang mga tawo nga direkta nagapalibot sa iya kag napaslawan siya nga magtukod sang pungsodnon nga makinarya sang mga kandidato kag tagakampanya.

Bangud sa tanan nga ginpaathag sa ibabaw, indi katingalahan kon ang hangkat ni FPJ kay GMA ginakapos na sang hangin ang nagaluya na. Ginakumpirma ang huyog nga ini sang mga report sa kampanya sang mga progresibong partido. Ginasalaming ang huyog nga ini sang tanan nga seryosong sarbey bahin sa eleksyon, kalakip ang sa Ibon. Gani bisan si Gen. Panfilo Lacson, nga isa ka malaut nga manuglapas sang tawhanon nga kinamatarung, nagabalibad mangin bise presidente ni FPJ kag ginapamilit ang pagpabilin bilang kandidato sa pagkapresidente.

Back to top