Gikundena sa NDF ang pagtangtang sa logban sa Caraga, Southern Mindanao

Rubi Del Mundo
Spokesperson
National Democratic Front-Southern Mindanao
Marso 10, 2005

Gikundena sa National Democratic Front Southern Mindanao ang trinaydor nga pagtangtang sa rehimeng Arroyo sa total log ban nganha sa mga rehiyon sa Caraga ug Habagatang Mindanao. Sa gidahum na, niyuko si Arroyo sa mga dagkong burgesyang kapitalista aron tilukon ang rekursos naturales sa pagpatuman niini sa dinagkong paglogging sa mga nahabiling mga kalasangan dinhi sa nasud.

Ang pagtangtang sa logging ban nagkahulugan og grabeng kadaut ngadto sa gatusan kaliboan ka mga mag-uuma ug Lumad nga nanimuyo sa Caraga Ranges nga maoy nahabiling lasang nga bahin sa utlanan sa Habagatang Mindanao ug Caraga. Sa kasamtangan, anaa na ang PICOP nga nagpahimulos sa mga nahabiling kalasangan sa mga lungsod sa Bagangga, Cateel, Boston ug Lingig. Gigamit sa maong kumpanya ang pasistang Special Forces sa AFP ug ang mga paramilitar nga Cafgu arun panalipdan ang konsesyon niini ug maglunsad ug mga operesyong militar ug pagpsywar batok sa mga walay ikasukol nga mga sibilyan.

Minilyon ka mga Pilipino ang hilabihang mabiktima sa kadaut sa kinaiyahan nga moresulta sa walay pugong nga pag-upaw sa kalasangan nga binuhatan sa mga komprador sa logging. Tataw nga ang gipagula nga anti-logging kunohay nga baruganan sa rehimeng Arroyo tulo ka bulan ang milabay sa dihang nahitabo ang dakong baha didto sa Quezon, dakong bakak ug gihimo lamang arun ipakita nga kunohay adunay pagbati ang rehimen sa katawhan nga nagsinggit supak sa logging.

Ang mga pasumangil nga gigamit ni Arroyo sa pagpatuman sa paglogging dinhi sa rehiyon mao ang pagpamenos sa illegal logging ug kuno, gihimo daw kini isip tubag lamang sa yangungo sa liboan ka mga pamilya nga nagsalig sa logging sa ilang panginabuhian. Apan, kini mga pakyas nga paningkamot arun takuban ang pagka-kontra-katawhan sa iyang mga palisiya ug programa kabahin sa kinaiyahan. Mas gipalabi pa sa rehimen ang pagtugot sa mga burgesyang kapitalista nga magpuga sa mga nahabiling kalasangan kaysa sa pagpreserba sa nasudnong patrimonya ug pagduso sa interes sa masang Pilipino.

Ang kabus nga mga Pilipino ug mga Lumad nga nagsalig sa ginagmayng pagpangahoy-kahoy alang sa ilang panginabuhian dili maprotektahan ug samot na nga dili makabenepisyo sa subling pag-abli sa komersyal nga logging sa rehiyon. Ang kasaysayan nagpamatuod kung giunsa sila pagtonto, paghasi ug pagdislokar sa pagsulod sa mga kumpanyang sama sa Alcantara & Sons ug PICOP ug sa mga dagkong operisyong militar nga gilunsad aron panalipdan ang ilang paglogging.

Sukwahi sa reaksyonaryong rehimeng Arroyo, ang demokratikong gobyerno sa katawhan nagpabiling nagmalig-on ug hugtanong nagbaton sa iyang mga gimbuhaton diha sa pagpreserba ug paghimo sa mga kalasangan ug kinaiyahan nga tiunay motubag sa mga panginahanglan sa mayorya nga masang Pilipinong nilupigan. #