Saulogon ang ika-35 anibersaryo sa Bagong Hukbong Bayan! Saulogon ang mga kadaugan sa armadong pakigbisog sa miaging tuig! Padayon nga pakusgon ang gubat sa katawhan!

Gregorio "Ka Roger" Rosal
Spokesperson
Communist Party of the Philippines
Marso 29, 2004

Sa tumang kadasig, atong saulogon ang ika-35 anibersaryo sa Bagong Hukbong Bayan (BHB). Subli nga lantawon nato ang nahimong kasaysayan sa gubat sa katawhan sa Pilipinas, sabton og maayo ang mga pagtulun-an gikan niini ug damhon ang labaw pang pagpakusog niini sa moabutay'ng katuigan.

Ang mapadayunon nga pagkaylap ug pagkusog niini sa entero kapupud-an gikan sa usa ka gamay ug huyang nga pwersa, ang lapad ug lalom nga suportang masa nga gitagamtan niini ug ang kapakyasan sa reaksyonaryong estado nga pildihon kini luyo sa kasamtangang superyoridad sa armadong pwersa niini sa ihap sa ginsakpan ug armadong kusog ug luyo sa dakong suportang pinansyal ug materyal nga gikan sa pinakagamhanang imperyalista sa tibuok kalibutan-kining tanan nagmapatuud sa pagka-insakto sa linya sa malungtarong gubat sa katawhan nga gipasiugda sa Bagong Hukbong Bayan ubos sa absolutong pagpangulo sa Partido Komunista sa Pilipinas.

Saulogon nato ang mga kadaugan sa BHB. Niining okasyona sa ika-35 anibersaryo sa BHB, saulogon nato ang nagdahunog nga mga kadaugon sa pagpaasdang sa armadong pakigbisog sa miaging tuig. Duyog niini, gisaludaran ug gihatagan nato og pinakataas nga pagdayeg ang atong mga rebolusyonaryong martir. Kung wala pa sa ilang mga tampo, mga sakripisyo ug walay pagtagana nga paghalad sa tanang mahimo lakip ang kinabuhi alang sa rebolusyon ug sa kaayohan sa katawhan, wala unta nato nakab-ot ang mga kadaugan.

Labaw'ng midako ang hukbong bayan sa miaging tuig. Gipanglimbasogan nato ang pagpadaghan sa mga Pulang manggugubat. Naggikan sila nag-una sa han-ay sa mga rebolusyonaryong organisasyong masa ug mga milisyang bayan sa mga sona ug natarang gerilya. Pinaagi sa kaylap ug sistematikong kampanya sa kasyudaran, nagkadaghan usab ang misampa sa mga mamumuo, kabus sa dakbayan, mga kabatan-onan ug estudyante. Pinaagi sa hingpit nga pag-awhag ug rekrutment, gilaoman ang pila ka pilo pa nga pagdaghan sa mga mopasakop sa BHB sa moabutay'ng katuigan.

Subling gi-ayo ug labaw'ng gipalambo ang mga kurso sa pagbansay sa hukbo. Ang tanan gipaagi pag-usab sa mga pagbansay politiko-militar. Gidugangan usab ang pagbansay aron makapadaghan ug makapalambo og mga Pulang komander para makab-ot ang target nga 25% sa mga pwersa mahimong opisyal sa nagkalain-laing ang-ang.

Gipalambo usab nato ang ideolohikal-politikal-kultural nga pag-umol sa mga Pulang manggugubat ug Pulang komander pinaagi sa hingpit nga pagtuon ug pagbansay sa mga kursong pangpartido, mga kursong politikal ug mga espesyal nga kurso, paglunsad og mga pagbansay ug aktibidad pangkultura ug pagsalmot sa mga politikanhong gimbuhaton diha sa han-ay sa katawhan. Gigahin nato ang 90% sa ilang panahon ug gimbuhaton ngadto sa paglunsad og gimbuhatong masa ug uban pang gimbuhatong pangpolitika ug 10% sa gimbuhatong militar.

Nahisubay sa panawagan sa ika-11 nga plenum sa Komite Sentral sa PKP, gilunsad sa nagkalain-laing yunit sa BHB ang nagkadaghan ug nagkasunson nga mga taktikal nga opensiba. Gikan sa Hunyo 2003, malampuson nga nakalunsad ang BHB og kapin usa ka taktikal nga opensiba matag semana. Nag-unang target sa BHB ang pinakamangtas nga mga yunit sa kaaway.

Gihatagan nato'g duso sa paglunsad og mga taktikal nga opensiba ang politikanhong kamahinungdanon, kagustohan sa masa ug matigum nga mga armas. Us� pa niini, gisiguro ang kadaugan sa matag taktikal nga opensiba pinaagi sa suportang masa, sigurong datos-paniktik, taas nga moral sa hukbo, pagbansay ug kahanas sa mga pwersa ug maayo nga pagpangulo, taktika ug teknikang militar.

Yawe sa mga kadaugan sa BHB ang absolutong pagpangulo sa Partido niini ug ang gitagamtam niining lapad ug lalom nga suportang masa. Ang pagsalmot ug pagpasiugda sa katawhan sa mga taktikal nga opensiba sa BHB ang naghatag sa hukbong bayan og depinido nga bintaha sa panagsangka. Pila ka pilo nga gipadako sa hugot nga panaghiusa sa hukbong bayan ug katawhan ang kusog sa atong hukbong bayan.

Gikan sa mga taktikal nga opensiba sa miaging usa ka tuig sa pagpaasdang sa armadong pakigbisog, nakatigum ang BHB og pila ka gatus nga haypawer nga mga hinagiban nga makaarmas sa puloan ka platun sa mga Pulang manggugubat. Kinahanglan kaayo og mas daghan pang mga armas aron maarmasan ang linibo-libong gilaoman natong marekrut sa BHB sa mga mosunod nga katuigan.

Sa miaging tuig, gipakita sa BHB ang mas taas nga kahanas ug katakus sa mga taktikang militar. Bisan sa mga sitwasyong depensiba, nahimo sa mga Pulang manggugubat ang pag-ilog sa inisyatiba, paglikay sa kadaot ug paglunsad og kontra-ataki batok sa kaaway. Padayon nga naglunsad og mga pagbansay ang BHB aron patas-on ang katakus militar sa mga Pulang manggugubat, ug aron makapadaghan ug makapalambo pa og mga Pulang komander.

Sukwahi sa taas nga moral sa mga Pulang manggugubat, kaylap ang demoralisasyon sa reaksyonaryong hukbo tungod sa pagkabutyag sa mga kadunot, anomalya ug binuhatang kriminal sulod niini, ilabina sa han-ay sa kadagkoang opisyal. Labaw pang nademoralisa ang mga yanong kasundalohan ug nahaubos nga mga opisyal sa reaksyonaryong hukbo bunga sa kapakyasan sa ilang mga gubat pagpanumpo, sa paturagas nga pagpasugok kanila diha sa walay kataposan nga gubat, sa pagpanampalas sa kadagkoang opisyales diha sa mga yanong sundalo ug sa kawalay pagtagad sa ilang kaayohan, ug sa nagkasamot nga pagkahimulag sa ilang hukbo diha sa masa.

Ang pagkatiurok nila sa demoralisasyon naghulhog sa ubang mga sundalo ug nahaubos nga opisyal nga maglunsad og sunod-sunod nga mga aksyong protesta ug pag-alsa. Kini usab ang naghulhog sa pagluwat sa usa ka platun sa CAFGU sa Mindanao niadtong Agosto 2003 ug pagbal� nila ngadto sa BHB.

Mainantuson nga gipatin-awan sa BHB ang mga sundalo sa AFP ug mga pwersa sa PNP ug CAFGU aron ibutyag ang kadunot sa mga organisasyon nga gi-alagaran nila, danihon sila nga pakigbisogan ang ilang demokratikong interes ug suklan ang kib�g, kriminal ug antikatawhang mga mando kanila, ug sa maksimum makigtinabangay o mo-anib na sa rebolusyonaryong kalihukan.

Taliwala sa pursigido nga pag-asdang sa gubat sa katawhan, nahimong labaw'ng bangis ang pasista ug teroristang kontra-rebolusyonaryong gubat sa AFP. Gatusan ka libo ang mga biktima sa mga kaylap nga operasyon ug pagpangabusong militar, sa mga pinugsanay'ng pagpabakwit ug rekonsentrasyon sa papulasyon, pagpamatay, pagpamusil, pagpanagit ug iligal nga detensyon, pagpanortyur, pagpanglugos, pagpanghasi, pagpangawat ug uban pang pagpanagmal ug pagpanampalas diha sa masa.

Kapin-kon-kulang 12 ka prayoridad nga natarang gerilya lamang ang kayahong konsentrahan sa mga tropa sa gobyerno sa usa ka panahon. Sa nahabilin nga kapin 100 uban pang natarang gerilya, luag nga makalihuk ang BHB sa pagpukaw, pag-organisa ug pagmobilisa sa masa, sa pagpalapad pa sa rebolusyonaryong baseng masa ug sa paglunsad og mga taktikal nga opensiba sa nahimulag nga mga yunit sa kaaway.

Sa mga lugar nga gikonsentrahan sa mga tropa sa kaaway, giharong ang reaksyonaryong hukbo ug ang reaksyonaryong gobyerno sa mga protesta sa katawhan gikan sa lokal hangtud sa nasudnong ang-ang tungod sa nagkadaghang pagpangabusong militar.

Sa mga moabutay'ng katuigan, labaw pang dugangan sa BHB ang pagpaasdang sa gubat sa katawhan. Padayon ang pagpakusog niini ug siguro nga malabwan pa niini ang mga kadaugan niining miaging tuig. Kung ang matag usa sa natarang gerilya makalunsad og usa ka taktikal nga opensiba matag tulo ka bulan, gawas pa sa mas dagkong mga taktikal nga opensiba sa mga yunit gerilya sa ang-ang rehiyon, dili mokubos sa lima ka taktikal nga opensiba ang mosuntok sa kaaway matag semana.#

Back to top