Pasingkion
ang mga taktikal nga opensiba, paslawon ang desperado nga Oplan Bantay
Laya II kag padakuon ang tubong sa pungsudnon nga hublag sa pagpukan
sang rehimen Arroyo!
Concha Araneta Panay Regional Committee Communist Party of the Philippines
Disyembre 26, 2007
Sa pagtakop sang 39 ka tuig nga paghimakas sang Partido
Komunista sang Pilipinas, ginapanginbulahan ang dalayawon nga kaisog
sang pumuluyo kag hangaway sang banwa sa ila walay tupong nga
pagpakig-away sa tunga sang nagadesperado nga tikang sang rehimen sa
pagpanguyapot sa poder. Dala ang ila dungganon nga halimbawa,
ginaganyat ang pumuluyo sa Panay nga mas maisog pa gid nga pangapinan
ang kinamatarung sang pumuluyo kag padayon nga paslawon ang Oplan
Bantay Laya II. Ginahanduraw man naton ang mga sakripisyo sang mga
rebolusyonaryong martir nga indi matupungan ang gin-amot sa masanyog
nga kahublagan naton subong.
Magapabilin ang tuig 2007 sa memorya sang malapit 4 milyones
nga pumuluyo sa panay bilang tuig sang dugang nga pagsarurot sang
pangabuhian, labi nga paglala sang garapal nga korapsyon, kag padayon
nga paglapnag sang kakugmat nga tuga sang rehimeng Arroyo. Sa pihak
sang ginapabugal sang rehimen nga pagbaskog sang balor sang piso,
padayon nga nagausmod ang industriya kag agrikultura sang pungsod.
Nagdugang pa gani ang pag-antos sang mga pamilya sang mga OFW, nga
masobra 60,000 sa panay nga nagasalig sa mga remitans halin sa gwa sang
pungsod.
Sa atubang sang nagalala nga gutom, kawalay-empleyo kag indi
maharaw nga pagtaas sang presyo sang langis, ginduso pa iya sang
rehimen Arroyo ang Human Security Act kag Oplan Bantay Laya II agud
padayon nga makalumbayag sa mga yawan-on nga kapritso samtang ginasupil
ang nagaibwal nga kaakig sang pumuluyo. Apang magapabilin sa memorya sang rehimeng Arroyo ang 2007
bilang tuig sang pagkapaslaw sang Oplan Bantay Laya II kag ang
malapnagon nga protesta kag pagbato sa iya sang lain-lain nga sektor
sang pumuluyo upod na ang oposisyon sa senado, simbahan, hudikatura,
medya, propesyunal kag signipikante nga bahin sang iya pwersa militar.
Sa Panay, ang 301st Infantry Brigade sa idalum sang 3ID
naglunsar sa sulod lang sang isa ka tuig sang sobra pulo ka operasyong
brigada kag halos isa ka gatos nga mga operasyong batalyon kag
kumpanya. Minilyon ang gasto sa operasyon kag dugang nga nagtublag sa
pangabuhi sang masa. Apang wala sila sang mapabugal nga kadalag-an
kundi ang nalab-ot nga mga bakante nga ginkampuhan sa talon. Sa pila ka
kahigayunan, sila pa ang na-isnayp, naambusan, napatyan kag napilasan.
Wala sang ni isa nga napatay ukon napilasan sa NPA sa tanan nga mga
operasyon nga ini.
Libo-libo nga pumuluyo ang nagpasakop sa armado nga
paghimakas, nagpatapu sa NPA kag sa mga rebolusyonaryo nga organisasyon
masa bilang paghakos nila sa kakinahanglanon sa pagpukan sang pasista
nga rehimen, organisado nga paglubad sang ila mga problema kag pagtukod
sang ila gahom pulitikal. Nagtubo sang 47% ang mga rebolusyonaryong
organisasyon masa sa kaumhan, nagdaku ang katapuan sang hangaway sang
banwa upod na ang ginatos ukon 85% nga dugang sa milisya sa baranggay,
kag ginatos ukon 20% ang nagdugang sa katapuan sang Partido Komunista.
Ang pagdaku nga ini walay tupong sa Panay halin sang liwat nga
magbaskog ang rebolusyon sa duso sang Kahublagan sa Pagpanadlong
sadtong 1994.
Ang walay pangirakira nga pagdukot sang ISG-MIB, 3ID, PA sa
duha ka respetado nga lider masa sa Panay, sanday Luisa Posa kag Nilo
Arado, kag pagtiro sa human rights advocate nga si Leeboy Garachico
nag-ani sang pagkondenar sa rehimen kag mas hugot nga pagbinuligay sang
lain-lain nga mga sektor upod na mismo ang madamo nga mga lokal nga
gobyerno agud labi nga pangapinan ang mga tawhanon nga kinamatarung kag
ipadayon ang hayag nga paghimakas sa kasyudaran.
Liwat nga ginpakita sang pumuluyo sang Panay ang kapasidad
nila sa pagparalisa sang bilog nga isla bunga sang pagpasakop nila sa
isla kalapad kag madinalag-on nga welga sang mga tsuper kag operator
batok sa onse na ka bes nga pagpasaka sang presyo sang langis kag
gasolina. Mas dalagku kag masunson sang sa nagligad nga tuig ang mga
isla-kalapad nga mga rali sa pagpamatok sang mga kagarukan kag mga
mapintas nga tikang sang rehimen kag magtubong sa panawagan sa
pagpatalsik sini.
Ang Partido Komunista sa Panay may ikasarang mag-impluwensya
sa dalagan sang burgis nga eleksyon. Sa Panay nga ginapabugal ni Arroyo
nga iya balwarte, nagdaog ang mga kandidato nga oposisyon sa Senado kag
madamo nga kontra-Arroyo nga mga kandidato sa mas manubo nga lebel,
upod na ang mga kandidato sa Partylist.
Nangin ehemplo ang Partido Komunista para sa iban pa nga mga
pulitikal nga pwersa pareho sang burgis nga oposisyon, ang simbahan,
ang medya kag bisan ang mga soldado kag opisyal sang AFP mismo agud
sila maghimakas man batok sa madumot nga paghingabot sang rehimen. Sa
nalab-ot nga armado kag pulitikal nga kusog, ang Partido may ikasarang
na subong nga magpatuman sang mga rebolusyonaryo nga polisiya sa sulod
kag gwa sang mga prenteng gerilya kag magpaandar sang rebolusyonaryong
hustisya sa malapad nga sakop sang isla.
Magabaskog kag magalapad pa ang impluwensya sang rebolusyon sa
padayon nga pagkamuklat kag paghugpong sang pumuluyo sa atubang sang
walay untat nga atake sang rehimen. Ang mapiguson nga mga polisiya ni
Arroyo mismo ang nagatudlo sa pumuluyo nga magdangop sa armadong
rebolusyon. Si Arroyo mismo ang nagaplastar sang mga kundisyon agud
mapaseguro ang pagkapaslaw sang Oplan Bantay Laya II. Ginapanawagan
sang Partido Komunista kag sang NPA ang bug-os nga pumuluyo sa panay
nga maghiliusa kag maghimakas agud gamiton ang ini nga mga kondisyon
para sa kadalag-an sang rebolusyon.
Mabuhay ang Partido Komunista sang Pilipinas!
Mabuhay ang masang Pilipino!
Concha Araneta Spokesperson Communist Party of the Philippines Panay Region
Back to top
|