Narito ang unang koleksyon ng MGA KANTA NG REBOLUSYONG PILIPINO. Sa pamamagitan ng mahigit sa apatnapung kanta na bumubuo ng unang koleksyon, sinisimulan namin ang paglalabas ng mahuhusay na kantang popular sa pambansa-demokratikong kilusan sa Pilipinas.

Layunin ng paglalabas ng antolohiya ng mga kanta na mapamalas ang naabot na yaman at kalidad ng rebolusyonaryong musika at awit sa Pilipinas. Lalo na nitong nakaraang ilang taon, mas malaki pang pagsulong ang natamo sa larangang ito ng gawain sa sining at panitikan: maraming bago at mahuhusay na kanta ang nalikha, itinanghal at lumaganap sa buong kapuluan. Kahit ang mga "lumang" kanta na nalikha at popular noong bago ipataw ang batas militar ay patuloy lumaganap at kinakanta sa buong kapuluan.

Inaasahan namin na ang koleksyong ito at ang susunod pang mga koleksyon ay makapagsisilbing konkretong inspirasyon at gabay para sa pagsisikap ng mga rebolusyonaryong manunulat at kompositor na higit pang pagyamanin at paunlarin ang rebolusyonaryong musika at awiting Pilipino. Higit pa rito, nais din nating maipalaganap sa mas sistematikong paraan ang mahuhusay na kantang kinagigiliwan at popular sa masa, pati na sa mga Pulang mandirigma, aktibista at kadre ng rebolusyonaryong kilusan.

Sa mabilis na paglaganap ng mga kanta sa iba't ibang rehiyon ng bansa, napapansin natin na nagkaroon ng pagbabago-bago ng tono at titik ng mga ito. Kadalasan, ang pagbabagong ito'y epekto ng mga pagkakaibang rehiyonal tulad ng magkakaibang karakter ng wika o lokal na tradisyon sa pag-aawit. Sa iba naman'y sadyang binago ang kanta para umangkop sa partikular na kalagayan ng teritoryo. Ngunit may mga pagbabago sa marami-raming kaso na dulot na ng mga kahinaan at kakulangan sa pagkakasalin-salin ng mga kanta. Sa paglalabas ng songbuk na may kasamang teyp, inaasahan nating magiging mas maayos at mas mabilis ang pagpapalaganap ng mga kanta.

Sa ilang kaso nama'y may taglay nang mga kahinaan ang orihinal na nilalaman at paglalapat ng musika. Kung minsa'y di maliwanag ang isinasaad ng kanta o dili kaya'y di magkaangkop ang titik at tugtog. May iba namang di naaangkop o di wasto ang isinasaad sa obhetibong karanasan at kalagayan ng pakikibaka. Ginawan ng patnugutan ng karampatang pagbabago at pagsasaayos ang ilang kanta na kabilang sa unang koleksyon.

Limitado ang ating kakayahan sa paglalabas ng dalawang teyp lamang. At dahil apatnapung kanta lang ang mapagkakasya sa dalawang teyp, sinikap namin sa pagpili ng mga kanta na magkaroon ng balanse ng luma at bagong kanta, ng representasyon ng mga kanta mula sa iba't ibang rehiyon, ng distribusyon ng iba't ibang tema, pati na ng representasyon ng ilang kantang may paksang partikular sa isang lokalidad o isyung taktikal. Gayunman, pangunahing batayan ng pagpili ng kanta ang mahusay na pagsasanib ng rebolusyonaryong nilalaman at masining na anyo, nang wala nang kakailanganing malaking pagbabago o pagsasaayos.

Sa dinami-dami ng ating mga rebolusyonaryong kanta, katiting lang talaga ang maipapabilang sa unang koleksyon. Ang marami'y nakareserba para sa susunod nang mga koleksyon. Ang iba naman na pumapaksa ng mga isyu o pangyayaring partikular sa isang lokalidad ay di na nasama sa koleksyon kung nauulit na lamang nito ang napili nang mga partikular na kanta. Ang iba nama'y may malalaking kahinaan sa nilalalaman o sa paglalapat ng musika.

Habang patuloy kaming nangongolekta at nagsusuri ng mga kanta mula sa iba't ibang rehiyon, hinihikayat din namin ang mga kasama na maging kritikal sa pagsusuri ng mga kanta, gumawa ng naisipan nilang mga pagbabago at ipaabot sa patnugutan ng proyekto ang kanilang panunuri at ginawang bersyon. Bukas din ang patnugutan sa mga kontribusyon na mga kantang orihinal, adaptasyon o salin para sa susunod na mga koleksyon; at sa mga puna, obserbasyon o mungkahi hinggil sa pagpipino, pagsasalin at pagbabagong ginawa sa mga kanta ng unang koleksyon. Hinihikayat din namin ang mga kasama na magkusa sa paggawa ng pagsasalin at o adaptasyon ng mga kanta ng unang koleksyon para ipalaganap sa kani-kanilang teritoryo o organisasyon.

Ang Tagalathala