|
Jaime Kasanag
Uguy-ugoy sa Madabong nga Kagulangan
Diin bala ang tadlong nga dalan
Sa masiot nga katalunan
Adlaw kag gab-i nagaantos
Sa pagtukad sa bukid kag kapil-asan
Diin balang mahawan nga dalan
Para nga makita ang mahawan nga kapatagan.
Makahilisa ang kapispisan
Sa ila mga pag-ambahan
Tuman kabugnaw pamatian
Ang lanton sa ilog, kasapaan
Pat-ud ila'ng nahibal-an
Ang tadlong nga dalan
Padulong sa ginahandum nga katibawasan.
Sa padayon nga pagpanakayon
Sa madabong nga kakahuyan
Isa ka dakung puting igang
Ang nagbalabag sa akon alagyan.
Ako ang nakibot sa nakit-an
Sa igang nahamtang
Wala sang tadlong mahawang dalan sa kasiutan.
Mahawan, tadlong nga dalan
Dalamguhanon gid lang
Ang panakayon sa kasiukan
Panghangkat sa akon pagkaisganan
Karon kay akon na natuipan
Ang sumpa sa katawhan:
Gahitan, lampuwasan ang tanan nga kasiutan.
|
|