Malayo ang narating, Nararating, ng baril na ito.   Sa puluhan, matiyagang inyuukit Ng bayarang sundalong mayhawak nito Ang bawat letra ng mga probinsyang Pinagdistinuhan sa kanya Ng kanyang mga panginoon: Davao, Cotabato, Samar, Tarlac, At sa huli'y Cagayan.   Sa mga sandali ng paghihintay ng misyon Para sa paglusob, o kaya'y ng pamamahinga Pagkatapos ng isang madugong labanan, Habang ang larangan ng digma Ay tila mapayapang tanawin lang ng isang lugar At ang baril ay laruang kinakalung-kalong, Mariing itinatarak ng bayarang sundalo Ang kanyang lanseta sa makinis na pisngi Ng puluhan hanggang sa maiuka niya Ang mapa ng kanyang karahasan. Nakadadarang ang ibinubugang apoy Ng baril na ito, lumulundo ang langit at lupa Sa dagundong na bumabasag ng bungo't Umuuka sa dibdib ng buong kapuluan.   Nakatutok ang baril sa mamamayan.   Ngayon, ang baril na ito'y Hawak na ng Pulang mandirigma. Bawat putok nito'y umuukit ng bagong titik Sa bungo ng kaaway saan mang dako Ng kapuluan.   Malayo ang narating, Nararating, ng baril na ito.