Kapag pula ang mukha ng araw, May digmaan. - Kasabihan   Pulang-pula ang mukha ng araw sa pag-aagawan ng gabi at liwanag sa pagluluksa ng takipsilim kaya't maging sa pagkalat ng dilim ang hiram na liwanag ng buwan ay kulay pula hindi dilaw sa maagang dapithapong humahabol sa paglubog ng araw sa kanluran   Sa tuktok ng bundok ay iisang anino matayog na bantayog sa dilim ang natatanaw di na madaraanan ng matitibay na paang bibitin-bitin sa mga baging   Ka Enyong, maniniwala ba ako sa matatanda? Kung bakit sa pula ng araw, pinawi ng digmaan ang buhay mo gayong dapat sanang nailigtas mo ang hininga ni Ka Greg na nagwakas dahil wala, wala ka ritong aming doktor?   Nakapagngingitngit isiping nasawi ka sa kamay ng malulupit na pasistang walang isip nadakip sa patibong ng mga buktot na hiwaga sa likod ng dilim ng pulang lumulukob sa mukha ng araw   Totoo ang sinabi mong humiram ng silahis ang buwan sa ngayo'y pulang-pulang araw. Tulad ng tanglaw ng prinsipyo mong mula sa Isabela hanggang Bikol ay naglingkod sa mga api   Pula ang mukha ng araw dahil may digmaan pula ito dahil nagngangalit ang mga mamamayan Patuloy na tatanglaw ang buwan sa madilim na landas na iyong tinahak at naiwan sa landas ng mga mandirigmang di tumitigil sa pakikibaka hanggang matiyak ang tagumpay