Sakua ang paglak-ang sa dalagku nga Kabatuhan Nagapangilat. Malain nga panahon ang patunda.   Natsekyar bala ang kahimtangan sang mga kaupod? Mahimo may ginabatyag ang bisan sin-o sa ila. Pat-od bala wala sang nagahukmong sa inyo ruta?   Kamusta ang kahimtangan nanday Tatay, Nanay, Inday? Dapat mapadala na ang madamo'ng sulat sa ila. Pat-od nalangkag na sila sang inyo mga balita.   Ah. Kalimti anay sila. Dapat pirme mag alerto. Kinahanglan maanting ang dalunggan, masipat ang mata Kag hinganiban sa masiot nga bahin ipuntarya.   Ara. Nagatupa na ang tuman ka munog nga ulan. May reklamo bala, pangabay ang mga kaupdanan? Wala? Mapagsik gihapon? Sige, padayon ang lakat.   Wala sang balay mahimo pahuwayan sa alagyan Nadumduman mo bala ang dinangtan sang mga masa poet:Jaime Kasanag title:Pila na ka tuig ang nagligad sining kagulangan?   Nagkagula sadto. Ginluthang sanday Tay Espin, Daniel. Puti nga kakugmat ang ginsabwag sang kaaway. Wala'y kalag nga mga pasista. May adlaw gid sila.   Ups... Kadanlog sang mga bato. Nagalubog ang tubig. Mga kagimkim kag dahon, sang daganas ginaanod. Bilis! Bilis! Bilis! Dasiga ang inyo nga pagtikang.   Mga hinganiban ninyo naputos bala sang dahon? Ina 'di dapat mabasa. Basi magsangal, magbisyo Pananglitan na panglakaton kamo maka-engkwentro.   Tagatuhod na ang tubig. Dali! Mapahamak kamo. Tuluka! Mga kagang nagapaningkaras papangpang. Dali! Dali! Dalagan! Yara sa unhan ang simangan.   Nadumduman mo bala pila ka tuig nga nagligad Sang si Tay Ed ginlalas, ginlamon sang suba sang Aklan? Makatalagam. Wala pang ginapasin-o ang baha.   Saka gilayon sa takasan. Dalikado ang suba. Pamatii ang nagahuganas nga ulo sang aha! Tanan nga naga-upang sa alagyan ginad lasa.   Sige. Magpahuway anay. Pero nagakasirom na. Padayunon ang lakat. Bisan sa hinay hinay lang. Pat-od nabalaka ang nagahulat sa kaladtuan. Makapoy magtukad sa bukid. Apang magatupong gid. Tawo ka. Sa imo pagsapong sang tiil siya lapaka.   Malawig kag makatalagam ang ginsaog nga suba Apang sa pagpanakayon nalampuwasan man naton.   Sakuon ang tikang sa halangdon nga pagpanglakaton.