Setiembre: Ipigsam ti tudo, Bay-am a mapasayakan ti taltalon; Agrusing ti bunubon iti maluglog a kapitakan, Agbalin a berde ti kataltalonan.   Ti naglabas a Marso ket kalgaw, Naapiten dagiti nagdawa a pagay; Naburak dagiti bingkol a natangken Iti pigsa dagiti arado ken suyod; Nasukatan ti pudot ti lamiis; Iti panagtudona, Nagbalian nga ikkis ti ulimek.   Itatta: Umal-allangugang ti napipigsa a pukkaw A saan a mapaulimek dagiti putok dagiti pasista; Nalabbaga dagiti plakard ken petision A naisurat iti dara... Napunasanen dagiti lua!   Agrusing latta ti bunubon, Agsabong latta dagiti mais ti Disiembre, Uray agtudo ken ipigsana ti bagyo!