Karadap... Nabayagen nga ur-urayen a kanito... Maturogkayo latta kas kaulimek ti apros Ti nalamiis nga angin ittata nga rabii, Naranggas nga pasista nga nakakampo.   Nabbasa ti linnaaw ti paltoog Ig-iggemak a nairot, Saan a marikna iti lamiis Ti pul-oy ti bumanbanisbis nga karayan Nga magaradgaden ti bingkol. Nabara ti panaglaok ti ling-et ken pudot ti rikna, Saan nga masalpot ti lamiis Dagiti bumabbaba nga ulep ti linaaw.   Praak! Kablum! Masilawan ti kulalanti a bala Ti aglawlaw. Bumtak ken madayyeg iti daga!   Awan sungbat dagiti pasista... Awan arimekmekdan... Napaksiatdan!   Sang at! Nasaknap pay laeng ti sipnget, Agrikuridemdem ti bulan ken apagbettak Ti lawag pay laeng iti mapupuuran a kampo. Nalabbaga pay laeng ti benggangna. Matananawagan ti nangato a turod Ti saan nga maiddep nga apuy.   Sumabat dagiti naragsak nga umili, Itag-tagayda dagiti nakumpiskar nga paltoog. "Nayon nga paltoog ti umili, agserbi kaniada ittatan!"