| 1. Lalake
Kumusta ka Inday iini ka ngay-an
Palaran nga oras kita naghituman
Kun maruruyag ka imo ako updan
Miting han pag-aram hinin kagiusan.
2. Babaye
Kay Oo gad Intoy iini gad ako
Piro diman ikaw an gintutuyo ko
Nahibaro ako may kadamo kamo
Inupod la ako han kasangkayan ko.
3. Lalake
Maupay nga takna nga ikaw binunyog
Bisan kun di ako an gintutuyo mo
Kun makatambong ka ako sigurado
Malalamragan ka han damo nga punto.
4. Babaye
Salamat kun sugad an magin resulta
Mababaton gihap mga pakiana
Kun igpapananglit pisi nga linubag
An damo nga buko karuyag mabadbad.
5. Lalake
Ano dawla Inday imo pakiana
Ayaw la pag-alang isaro ha iba
Pariho han tubig ayaw pagpun-ura
Pasagdi umawas, umanod ha dagat.
6. Babaye
Ako nagugupong hinin nga kahimtang
Pirme nga pirme la inin kakurian
Mga parag-uma, mga trabahador
Daw lupyat nga tanum nga diri narabong.
7. Lalake
Mga parag-uma pirme tiniyupi
Hinin nga agaron hadi ha kaumhan
Mga trabahador kusog ginhimulsan
Han kapitalista hakug ha ganansya.
8. Babaye
Ano ba an surok han kakurian ta
Kay basi masulsog gamot han problema
Pariho han kahoy kun pupukanon ta
Gabuton an gamot bas di na umorsa.
9. Lalake
An imperyalismo ngan an pyudalismo
Ngan an burukrata nga kapitalismo
Tulo nga demonyo amo inin ulo
Nagsuyop han dugo mga Pilipino.
10. Babaye
Ano naman dawla angay nga solusyon
Agud masulbar na problema han masa
Maitum nga langit ha ira naglambong
Angay nga saliwnan lamrag han paglaum.
11. Lalake
Rebolusyon gudla tama nga solusyon
Amo magpupukan han magtiyupi-on
Armado nga kusog han pukaw nga masa
Ubos han paggiya Partido Komunista.
|
