Pahayag sg suporta sa Cadiz 13

Agosto 24, 2008
Pambansang Katipunan ng Mga Magbubukid (PKM)

Mainit nga pagpanginbulahan sa mga kasubong namon nga mangunguma-mangunguling sa ila kadalag-an, sa pagkahilway sa 9 nga mga binilanggo sa Syudad sg Cadiz . Kami mainit nga nagasaludar sa kaisog kg kapursigido nga ginpakita sg mga biktima kg ila mga pamilya, sa wala sg kakapoy kg kataka nga paghimakas batuk sa mapiguson nga laye sg reaksyonaryong gobyerno pasistang Task Force Ilahas � AFP kg mga berdugong RPA-ABB.

Tungod sg kawala sg bastante nga duta kg kagamitan sa panguma kg libre nga serbisyo sosyal sg gobyerno, ginatos tubtob linibo ka mangunguma ang nagakapilitan sa pagpanguling para may mapakaon sa pamilya. Apesar sg tuman ka hago kg mauti nga malawig nga proseso sa pagpanguling, sila nagaantus para lamang mabuhi ang ila pamilya, makakaon, makabeste, bisan indi na makapaeskwela.

Bisan pa sa makapalasmo nga obra sg pagpanguling, ang imol nga mangunguma nagaasuprer sa tuman ka nubo nga bili sg ila uling sa tag P30-P50.00 kada sako. Halos kulang gani sa isa ka kilo nga bugas bangud sg wala untat man nga pagsaka sg presyo sg bugas, asin, sud-an, gas kg iban pa.

Wala labot sini, sila biktima pa sg mga pagpangilkil sa mga military detatsment.. Indi sila makaagi kun indi magbilin 1-2 ka sako uling o kwarta sa military detatsment.

Kag mas malala pa ining karon nga pagkonsabohay sg probinsyal nga gobyerno, Task Force Ilahas kg RPA-ABB sa pagpangdakop sg mga imol nga mangunguma nga nagatinguha nga mabuhi sg tawhanon. Masami sila ang biktima kg "karnero nga ginasakripisyo" sa ngalan sg peke nga kauswagan kg para sa rekurso sg korapsyon sg mga kawatan nga mga upisyal sg gobyerno. Samtang ang matuod nga mga kawatan kg ekstorsyonista katulad ni GMA nagapabilin sa gobyerno.

Ginasakyan man ini sg mersenaryong AFP, 302nd kg 303rd Bgde para wasakon ang mga rebolusyonaryong baseng masa, pagtuga sg kahadlok sa pumuluyo sa idalum sg paslaw nga OPlan Bantay Laya2 (OBL2).

Ang mga imol nga mangunguling � mangunguma ginakabig nga mga criminal bangud sg pagpanguling. Ang mga kapitalistang illegal loggers, dalagku nga minahan nga amo ang nagakalbo sg kabukiran, nagahimo sg disyerto sa tunga sg kabukiran kg naga-agaw sg duta sg mga mangunguma, ginakabig pa nga mga dungganon! Isa ka pagtampalas sa dungog sg pumulyong Pilipino!

Wala na kita sg iban pa nga saligan kungdi ang aton mala-higanteng kusog agud wasakon ining nagahungayo nga sistemang mala-kolonyal, mala-pyudal kg ang pagpalayas kay GMA sa poder. Padayon kita nga magpabaskog kag magpabakod sg aton hanay upod sa mamumugon kg iban pa nga pigos kg ginahimuslan. Armadong paghimakas lamang ang aton solusyon agud malab-ot ini nga katuyuan. Ipadayon ang paghimakas para sa kahilwayan sg nabilin pa nga mga biktima nga padayon napriso sa Cadiz kg Calatrava kg iban pa nga mga biktima sg tawhanon nga kinamatarung! Mag-upod kita sa New People's Army (NPA).

Ipakig-away ang matuod nga reporma sa duta kg pungsodnon nga industriyalisasyon! Duta nga ulumhan! Indi minahan, indi lulubngan! Bugas, indi militar kg armas! Untaton ang militarisasyon sa idalum sg OBL2! Bungkagon ang perwisyo, mersenaryo kg kontra-pumuluyo nga RPA.

Ginpirmahan:
Julian Pobre
Pambansang Katipunan ng Magbubukid
Rex Parreno Chapter
Southwest, Negos Island

Back to top