Mapaslawan ang Bag-ong Padihot nga Amnestiya sang Papet nga Gubyernong Arroyo

Gregorio "Ka Roger" Rosal
Spokesperson
Communist Party of the Philippines
Nobyembre 05, 2002

Naubusan na sang hangin ang tuman kahambog nga papet nga gubyernong Macapagal-Arroyo kon paano lutuson ang nagabaskog nga rebolusyong Pilipino nga ginapamunuan sang Partido Komunista ng Pilipinas. Nagsaulog sila sa ginlauman nilang kadalag-an sang ila kampanya nga lakipon sang European Union ang NPA kag si Kaupod Jose Ma. Sison sa listahan sang mga terorista. Apang nakita nila nga wala ini nakaduso sa NDFP nga mag-ampo sa "surrender talks" nga ginatanyag sang gubyerno. Sa subong naghabyog ang papet nga rehimen sa dumaan kag inutil nga pamaagi sang pagpaniplang - ang pagtanyag sang amnestiya para sa mga nag-armas kontra sa papet kag reaksyunaryong gubyerno.

Ang pagtanyag sang amnestiya kabahin lang sang duha ka taktika sang reaksyunaryo kag papet nga gubyerno kontra sa mga pwersang rebolusyonaryo. Ang nagapangunang taktika amo ang paggamit sang kalakasan militar agud dugmukon ang armadong rebolusyon. Ugaling bangud wala sang maitupong nga pamaagi ang reaksyunaryong gubyerno agud tapnaon ang malawigan nga inaway banwa sang NPA, pirme kaapid sang kontra-rebolusyonaryong gera sang gubyerno ang paggamit sang nagkalain-lain nga porma sang saywar kag pagpaniplang.

Apang bangud gani ang mga ini lunsay pagpaniplang kag binutig lamang, natural nga wala sang signipikanteng epekto ini sa panindugan sang mga rebolusyonaryo kag mangin sa pagtuo sang pumuluyo. Nahibal-an sang pumuluyo nga nalab-ot na sang rebolusyonaryong paghulag sa nagligad nga sobra nga tatlo ka dekada nga baliskad sa paniplang sang gubyerno kag militar, ang rebolusyonaryong kahublagan nga ginapamunuan sang CPP-NPA-NDFP ginalakipan sang mga matuod-tuod nga rebolusyonaryo nga nagapakigbatu sang husto kag bug-os panahon para sa interes, kinamatarung kag buasdamlag sang pumuluyong Pilipino.

Kabaliskaran sa ginapanghambal sang mga tagpamaba sang papet, reaksyunaryo kag garuk nga gubyerno kag mersenaryong militar sini, ang kadam-an nga katapu sang Partido, Pulang hangaway sang BHB kag aktibista may mataas nga ihibalo sa matuod nga kahimtangan sang aton banwa, sa ugat sang mga palaligban kag kagarukan sang subong nga sistema, kag labaw sa tanan, muklat sa kon ano ang ultimo nga solusyon sa mga kagarukan nga ini.

Kag ina wala sang iban kundi ang paglunsar sang armadong paghimakas tubtub sa lubos nga mapukan ang nagaluntad subong nga mapanghimulos kag mapiguson nga sistema kag maislan sang bag-ong orden nga may matuod nga kahilwayan kag demokrasya kag nagagarantiya sang isa ka hilway, malinong, matarung, kag bugana nga sistema sang katilingban.

Ang kamuklatan nga ini ginadala sang tagsa ka kadre kag katapu sang rebolusyonaryong hublag halin sa mga pinuno tubtub sa masang katapuan. Ginapat-ud sang Partido nga ang bilog nga katapuan konsolidado sa ideolohiya, pulitika kag organisasyon ilabi na pagkatapos sang madinalag-on nga naisulong ang Ikaduha nga Dungganon nga Kahublagan Pagpanadlong. Ini man ang kabangdanan kon ngaa wala sang ano man nga kontra-rebolusyonaryong kampanya sang nagbulos-bulos nga mga papet nga rehimen ang nakatapna sa paghimakas nga ginapamunuan sang CPP-NPA-NDFP. Ini man ang kabangdanan kon ngaa pat-ud nga mapaslawan ang ano man nga kontra-rebolusyonaryong kampanya militar kag kampanyang saywar sang reaksyunaryo, lubos nga papet kag tuman ka garuk nga gubyernong US-Macapagal-Arroyo.

Sobra nga ginapakagamay kag gina-insulto ang mga komunista kag rebolusyonaryong Pilipino sang mga militarista nga may makitid sang pensar pareho nanday Angelo Reyes kag Roilo Golez kag mga traidor sa Partido Komunista kag rebolusyonaryong kahublagan pareho nanday Blas Ople kag Rigoberto Tiglao. Bangud nagapangin-pulos kag nagapanamit sa mga mataas nga pusisyon sa gubyerno kag lubos nga nahamulag sila sa matuod nga kahimtangan sang pumuluyo, tuman kahapos para sa ila nga maglubid na lang sang balas agud hatagan lang kalipay ang mga ginadiyos-diyos nila nga US kag punong papet sini nga si Gloria Macapagal-Arroyo.

Pareho man sang pagtanyag sang wala-pulos nga back chanelling talks agud tiplangon kag ipahigad ang pormal nga sugilanon pangkalinungan kag mga kasugtanan sa nagligad, isa naman ka pagpanunto ang panibag-ong pagtanyag sang amnestiya para sa mga rebolusyonaryo kag komunista. Isa lang ini nga pag-insulto sa kamuklatan kag integridad sang tanan nga rebolusyonaryo kag nagabatu nga Pilipino. Kabigon lang ini sang mga rebolusyonaryo nga wala sang iban kundi isa ka pagpaniplang kag pagsiod sa tanan nga nakamuklat kag nagabatu. Kabigon lang ini nga pagtinguha sang rehimen bilang kabaylo sa mga matuod nga solusyon sa mga basehang problema sang pumuluyo kag sang pungsod.

Pareho sang tanan nga gintayag nga amnestiya sang nagligad, indi gid magmadinalag-on ining bag-o nga ginatanyag nga amnestiya. Wala ginbaton sang pinakamadamo nga rebolusyonaryo kag komunista ang mga gintanyag nga amnestiya sa nagligad kag wala ginbali sang mga ini ang malig-on nga panindugan sang mga lider kag katapu sang rebolusyonaryong kahublagan nga maghandum kag padayon nga ipakigbatu ang mga pundamental kag matuod nga mga pagbag-o pangkatilingban. Labi nga langawon ang bag-o nga padihot nga amnestiya. Makita sang rehimeng Arroyo, kon ano kabaskog tampaon sang labi nga nagakonsolida kag nagabaskog nga CPP-NPA-NDF kag bilog nga rebolusyonaryong kahublagan ining bag-ong padihot nga amnestiya. Sa tigaylo nga hatagan pa sang igtalupangod, lunuron lang ini sang nagahagiyos nga pagbatu sang mga demokratiko kag patriyotikong pwersa sang pumuluyo kag sang mga opensiba nga ginalunsar sang hangaway sang banwa sa malapad nga kaumhan.###

Back to top