Ano ang Human
Security Act?

ANG HSA ay isang batas na nagtatakda ng mga kaparusahan para sa tinatagurian nitong krimen ng "terorismo." Ang HSA ang kauna-unahang batas sa Pilipinas na pumapatungkol sa "terorismo."

Ayon sa HSA, ituturing ngayong "terorismo" ang iba't ibang krimeng nakasaad sa Revised Penal Code at iba't ibang mga batas at dikreto kung ang mga iyon ay isinagawa para "maghasik at lumikha ng kundisyon ng malawakan at di karaniwang pangamba at kaguluhan sa hanay ng taumbayan upang pwersahin ang gubyerno na tuparin ang isang iligal na kahilingan."

Kabilang sa mga aktong kriminal na ituturing na "terorismo" alinsunod sa depinisyon ng HSA ang pamimirata, rebelyon o insureksyon, kudeta, pagpatay, pangingidnap at malubhang iligal na detensyon, paninira ng ari-arian, panununog, hijacking, iligal na pag-iingat ng mga baril at iba pa.

Maparurusahan nang di bababa sa 40 taon pagkakakulong (katumbas ng habambuhay na pagkakabilanggo) nang walang pagkakataong makapag-parole ang mga mahuhusgahang nagkasala, samantalang ang mga kasapakat ay maparurusahan nang 17-20 taong pagkakabilanggo.

Anu-ano ang mga
pangunahing
probisyon ng HSA?

TADTAD ang HSA ng mga probisyon na tuwirang yumuyurak sa mga karapatang sibil at karapatang-tao.

Pangunahin sa mga ito ang sumusunod:

Paniniktik. Sa ilalim ng HSA ay pinasasaklaw ang karapatan ng estado na magsagawa ng paniniktik o surbeylans laban sa mga organisasyon na ikinategoryang "terorista" o mga sinasabing suspek sa "terorismo." Isinasaisantabi ng HSA maging ang makitid na proteksyong nakasaad sa "Anti-wiretapping law."

Maging ang mga pinaghihinalaang tumutulong o sumusuporta sa mga suspetsadong terorista ay maaaring tiktikan ng pulisya sa pamamagitan ng pag-tap o pakikinig sa mga pribadong komunikasyon sa pamamagitan ng mga kagamitang pansurbeylans.

Ang pagsasaligal ng surbeylans sa mga pinagsususpetsahang "terorista" at ang pagharang at pagrekord ng mga awtoridad sa mga usapan at/o komunikasyon sa pagitan nila at ng kanilang diumano'y mga kasapakat ay paglabag sa karapatan sa pribadong komunikasyon ng bawat indibidwal. Nakasaad ang karapatang ito sa International Covenant on Civil and Political Rights ng United Nations at ginagarantiyahan maging ng Artikulo III, Seksyon 3 ng konstitusyon ng reaksyunaryong estado.

Walang taning na detensyon at pagdakip nang walang mandamyento. Nakasaad sa Seksyon 18 na kahit walang mandamyento, maaaring dakpin ang isang suspetsadong "terorista" at ibimbin nang tatlong araw nang walang isinasampang kaso laban sa kanya.

Ayon naman sa Seksyon 19, sa panahong may nakaamba o aktwal nang nagaganap na "teroristang" atake, maaaring lumampas sa tatlong araw ang pagbibimbin alinsunod sa pahintulot ng mga upisyal na walang kapangyarihang panghukom, tulad ng umano'y mga "Human Rights Commission" sa antas munisipyo pataas.

Ang mga probisyong ito ng HSA ay malinaw na paglabag sa saligang karapatang-tao laban sa iligal na detensyon at matagalang detensyon na walang malinaw na kaso. Ang pagbibigay ng karapatan sa mga upisyal na walang kapangyarihang panghukom ay nagbubukas din sa labis na pag-abuso ng mga upisyal ng gubyerno.

Sa katunayan, kahit ngayon ay hindi sinusunod ng mga pwersang panseguridad, militar at pulis ng estado ang anumang takdang bilang ng araw ng pagbibimbim sa mga "suspek" nang walang nakasampang kaso. Maraming inaabot sa kalagayang ito nang buwan at higit pa, at lalong dumarami pa ngayon ang mga kaso ng pagdukot upang ikutan ang mga nakasaad sa batas. Nitong huling pitong taon mula nang umupo si Arroyo sa poder, halos isang libo nang mga aktbista at mga sumusuporta sa demokratikong kilusan ang pinapaslang ng mga pasistang pwersa ng estado.

House arrest. Ayon sa Seksyon 26, kahit pinaghihinalaan pa lamang, at kahit walang malakas na ebidensya ng pagkakasala, maaaring iutos ng isang korte ang pagpapailalim ng isang "suspek" sa "house arrest" o limitahan ang kanyang pagbyahe sa loob lamang ng isang syudad o munisipyo. Alinsunod sa HSA, maaaring pagbawalan ng korte ang gayong suspek na gumamit ng telepono, email, kompyuter, internet o anupamang anyo ng komunikasyon.

Ang mga probisyon na ito ng HSA ay labag sa karapatan sa malayang paglalakbay. Gayundin, sa pagpapataw ng gayong kaparusahan o paglilimita ng karapatan kahit walang malakas na ebidensya, nilalabag ng HSA ang prinsipyo na ang isang tao ay ipinagpapalagay na inosente hangga't di napatutunayan sa harap ng korte na siya ay may sala.

Pagbulatlat at pagkontrol sa mga deposito, account at rekord sa banko. Sa ilalim ng Seksyon 27-30, ang mga elemento ng pulisya ay pinahihintulutang bulatlatin at kontrolin ang mga deposito, account at rekord sa bangko o institusyong pinansyal ng suspek sa "terorismo" hanggang sa puntong masekwester o kaya'y ipagbawal ang paggamit sa naturang mga account at rekord.

Sinu-sino ang
bubuo sa ahensyang
magpapatupad
ng HSA?

AYON sa Seksyon 53-54, ang pagpapatupad ng HSA ay pangangasiwaan ng Anti-Terrorism Council (ATC) sa ilalim ng pangkalahatang pamumuno ng Executive Secretary. Pangalawang pinuno nito ang kalihim ng Department of Justice. Mapapabilang din sa ATC ang National Security Adviser at mga kalihim ng Department of Foreign Affairs, National Defense, Interior and Local Government at Finance. Samantala, tatanggap ng reklamo laban sa mga pulis at iba pang nagpapatupad ng batas ang Grievance Committee na bubuuin ng Ombudsman, Solicitor General at undersecretary ng DOJ.

Napakalaking kabalintunaan na ang tinutukoy na mga myembro ng Anti-Terrorism Council ay ang kasalukuyang bumubuo ng Cabinet Oversight Committee on Internal Security--ang mga kilalang militarista't sagad-sagarang reaksyunaryo na sina Executive Secretary Eduardo Ermita, Secretary of Justice Raul Gonzalez at National Security Adviser Norberto Gonzales. Sila ang pangunahing mga utak ng paghahasik ng terorismo at paglulunsad ng walang patid na kampanya ng pamamaslang at panunupil sa mga demokratikong pwersa, masugid na oposisyon at mamamayan.

Sa pamamagitan ng ATC, asahang isasagawa nang lalong walang pakundangan ang mga atake laban sa mga aktibista, abugado, taong simbahan, kagawad ng midya at iba pang pwersang kumakalaban sa rehimeng Arroyo.

Dahil sa mga duguang kamay nila nakasalalay ang pagpapatupad ng anti-teror na batas, nagbabadya ang higit pang pasistang paglabag sa karapatang-tao. Alinsunod sa HSA, sa isang kumpas ng Anti-terrorism Council, sinuman ay maaaring paratangang "terorista" at tratuhin ayon sa mga binanggit na pasistang probisyon.

Paano gagamitin
ang HSA laban sa
kilusang masa?

GAMIT ang labis na masaklaw nitong depinisyon ng "terorismo," ang iba't ibang anyo ng lehitimong kilos protesta ng mamamayan ay maaaring sikilin alinsunod sa HSA. Maaaring ituring na "terorismo" ang mga mapayapang demonstrasyon laban sa rehimen at laluna ang mga higanteng kilos-masa katulad ng people power--na sa kabalintunaa'y siya ring nagluklok sa poder sa kasalukuyang kinamumuhiang rehimen.

Ang mga welga ng mga manggagawa, laban ng mga magsasaka kontra sa mapagsamantalang mga panginoong maylupa, boykot sa eskwelahan ng mga estudyante at protesta ng mamamayan hinggil sa iba't ibang isyung panlipunan ay maaaring ikategoryang akto ng "terorismo." Samakatwid, kikitlin ang mga kilos protesta laban sa estado sa mga pagawaan, eskwelahan at komunidad at magmimistulang nakapailalim sa batas militar ang mga lugar na ito. Asahang ibayong magiging malupit ang panunupil laban sa mga aktibistang kumikilos sa ligal na larangan. Lalong titindi ang sistematikong pagsupil sa mga rali at iba pang kilos protesta. Dadami ang mga kaso ng ekstrahudisyal na pamamaslang, kara-karakang pag-aresto at pati mga sikretong pagdukot.

Ano ang implikasyon
ng HSA sa usapang
pangkapayapaan?

NAGSISILBING malaki at mabigat na ligal na hadlang ang HSA sa pag-abante ng usapang pangkapayapaan. Lalo nitong pinaliliit, kundi man ginagawang imposible, ang posibilidad na umusad pa ang usapan. Dagdag ang HSA sa dati nang balakid na pakikialam ng US at pagpapabilang nito sa PKP, BHB at kay Prof. Jose Ma. Sison, Senior Political Consultant ng NDF, sa listahan nito ng mga "terorista." Ang usapin tungkol sa listahang ito ang siyang prinsipal na humahadlang sa usapang pangkapayapaan mula pa noong 2004.

Oras na pormal na ideklarang "terorista" ng rehimeng Arroyo ang PKP, BHB at NDF sa ilalim ng HSA, lahat ng dati nang kasunduang napagtibay sa proseso ng usapang pangkapayapaan ay mababalewala. Bukod rito, ang HSA ay taliwas sa mga probisyon hinggil sa karapatang-tao na nakasaad sa CARHRIHL.

Asahang lalo ring babalewalain ng rehimeng Arroyo ang Joint Agreement on Safety and Immunity Guarantees (JASIG), isa sa mga pangunahing kasunduang napagtibay sa usapang pangkapayapaan at siyang nagbibigay-proteksyon sa mga kagawad ng panel ng NDF at GRP na sangkot sa usapan. Katunayan, si Prof. Jose Ma. Sison ay nauna nang ikinampanya ng rehimeng Arroyo sa US at Europe na mapabilang sa listahan ng mga "terorista." Gamit ang HSA, tiyak na lalong gigipitin ng rehimeng Arroyo si Professor Sison at iba pang mga negosyador at konsultant ng NDF sa usapan.

Sa pagsasabatas ng HSA, pinatutunayan lamang ng rehimeng US-Arroyo na hindi ito interesado sa tunay at pangmatagalang kapayapaan.

Paano lalabanan
ng sambayanang
Pilipino ang HSA?

NANANAWAGAN ang Partido sa lahat ng mga demokratikong pwersa at buong sambayanang Pilipino na puspusang kumilos para labanan ang Human Security Act ng 2007.

Ang pakikibaka para ibasura ang HSA ay mahigpit na nakakawing sa pakikibaka upang wakasan ang pasistang paghahari ng rehimeng US-Arroyo.

1. Isulong ang kilusang masa at palawakin ang nagkakaisang prente laban sa HSA, kabilang ang mga demokratikong organisasyong masa, mga progresibong partido, mga organisasyong nagtataguyod ng mga kalayaang sibil at karapatang-tao, mga nasa pampulitikang oposisyon at lahat ng iba pang organisasyon, grupo at indibidwal na maaaring mahikayat dito.

2. Ilantad ang pasistang nilalaman at layunin ng HSA. Gamitin ang mga pampubliko at iba pang porum sa talakayan, masmidya, internet at lahat ng iba pang posibleng paraan ng pagpopropaganda sa mga paaralan, komunidad, pagawaan at iba pa para ilantad sa malawak na mamamayan ang idudulot pa nitong pagsikil sa mga karapatang sibil at lalo pang pagpapahirap sa buong sambayanan.

3. Maglunsad ng lahat ng posibleng porma at malikhaing pamamaraan ng protesta. Kailangang maglunsad ng papalaking mga protesta sa lansangan, paaralan, pagawaan at mga komunidad upang ipakita ang galit at pagtutol ng mamamayan sa HSA.

4. Palawakin ang pandaigdigang pagkundena sa rehimeng Arroyo sa pamamagitan ng paglalantad ng duguang rekord nito sa paglabag sa karapatang-tao. Hikayatin ang iba't ibang mga internasyunal na organisasyon, ahensya at personalidad na makiisa sa mamamayang Pilipino at magpahayag ng pagtutol sa HSA at sa pasistang panunupil.

Ano ang
rebolusyonaryong
tugon sa HSA?

MAHIGPIT na tungkulin ng rebolusyonaryong kilusan na gawin ang lahat ng nararapat na pamamaraan para tutulan at labanan ang HSA at ang paghahasik ng terorismo ng estado.

Pangunahin na rito ang pamumuno sa mamamayan para isulong ang malaganap, malakas at puspusang paglaban sa HSA.

Bilang tugon din sa pagsasabatas ng HSA, tuluy-tuloy na pasisinsinin at paiigtingin ng BHB ang mga taktikal na opensiba sa buong bansa. Ang bawat taktikal na opensiba ay magsisilbing matimbang na ambag sa pagparusa sa rehimeng Arroyo at mga alipures nito na siyang utak at tagapagpatupad ng kampanya ng pampulitikang pamamaslang, terorismo at iba pang karahasan laban sa mamamayan.