Ginahatag sang NDFP ang pinakamataas nga pasidungog kanday Tanya Domingo, Ian Dorado, Kemberly Jul Luna kag Ian Maderazo

Luis G. Jalandoni
Chief International Representative
Member, National Executive Committee
National Democratic Front of the Philippines Enero 25, 2010 /em>

Ginahatag sang National Democratic Front of the Philippines (NDFP) ang pinakamataas nga pasidungog sa aton mga bataon nga martir kag baganihan sang pumuluyo: Tanya Domingo, Ian Dorado, Kemberly Jul Luna kag Ian Maderazo. Ginapaabot sang NDFP ang pinakahimpit nga pag-unong sa ila mga pamilya, sa ila organisasyon, mga abyan kag kaklase.

Sanday Tanya Domingo kag Ian Dorado, mga estudyante sang Fine Arts kag mga aktibista pangkultura halin sa Unibersidad sang Pilipinas ginpatay sang mga suldado sang pasistang rehimeng Arroyo sadtong Enero 14, sa Bulacan, Central Luzon. Napatay si Ian Maderazo sang Unibersidad sang Pilipinas-Los Banos, isa ka iskolar kag lider estudyante, sadtong Enero 9 sa Macalelon, Quezon sa Southern Tagalog. Napatay naman si Kemberly "Kimay" Jul Luna, lider estudyante sang Mindanao State University--Iligan Institute of Technology sadtong Disyembre 15, 2009 sa Valencia City, Bukidnon sa Mindanao.

Madalom sila nga nag-integrar sa mga pigos kag nagahimakas nga masa, nagpasakop sa rebolusyonaryong kahublagan nga lubos kapagsik nga ginapakigbato ang ginapakig-away sang masa, gingamit ang talento kag kusog nila agud alagaran ang pumuluyo kag nagdesisyon nga mangin mga hangaway sang armadong rebolusyon sang banwa.

Sa malawig nga rebolusyonaryo nga tradisyon sang pamatan-on, halin sa panahon ni Emilio Jacinto sa Katipunan, tubtob sa mga pamatan-on sa Bagyo sang Una nga Kwarto, ginpadabdab sang aton nga mga mahal nga bataon nga martir ang dalan para sa paghimakas sang pumuluyo nga Pilipino para sa pungsodnon kag pangkatilingban nga kahilwayan. Ang madalom nga pangako kag ang himpit nga balatyagon sang aton nga mga bataon nga martir nga makig-away para sa kahilwayan kag kaluwasan naghatag-inspirasyon sa pamatan-on kag bilog nga pumuluyo para labi pa nga pataason ang lebel sang rebolusyonaryo nga paghimakas.

Saluduhan naton ang aton nga mga bataon nga martir. Hatagan naton sang pinakamataas nga pasidungog sanday Tanya Domingo, Ian Dorado, Kimay Jul Luna kag Ian Maderazo! Tugutan ang ila bug-os nga komitment kag pag-alagad sa pumuluyo kag rebolusyon nga mangin masanag nga iwag sang inspirasyon sa pamatan-on sang Pilipinas kag sa bilog nga kalibutan.

Back to top