34 pinaslang, 104 ikinulong ng AFP/PNP habang dinidinig sa Korte Suprema

Nagtapos na ang pagdinig ng Korte Suprema sa mga argumento mula sa mga abugado ng mga nagpetisyong ibasura ang Anti-Terror Law at tugon ng gubyerno hinggil dito noong Mayo 17. Umabot sa siyam na magkahiwalay na araw sa loob ng apat na buwan ang mga pagdinig, kasama ang pagbibigay ng upinyon ng dalawang husgadong tinaguriang “kaibigan ng korte.” Habang dinidinig ang mga petisyon, walang awat ang mga pamamaslang, pag-aresto, sarbeylans at pag-redtag ng mga upisyal ng militar sa mga kalaban ng ATL.

Sa pagbilang ng Ang Bayan, hindi bababa sa 34 ang kaso ng ekstrahudisyal na pamamaslang na kagagawan ng mga pulis at sundalo sa panahong ito. Kabilang dito ang madugong pagpaslang sa siyam na aktibista sa tinaguriang “Bloody Sunday” noong Marso 7 sa Southern Tagalog, at sa kapitan sa barangay sa Tapaz, Capiz na imbwelto sa pagtatanggol sa mga pinaslang na Tumandok noong Marso 1. Noon ding Marso 3, naganap ang tangkang pagpaslang kay Atty. Karlo Gullen na abugado ng mga Tumandok.

Sa loob din ng panahong ito, di bababa sa 104 aktibista at ordinaryong sibilyan ang inaresto at sinampahan ng gawa-gawang mga kaso. Kabilang sa pinakamalalaking kaso ang pag-aresto sa limang aktibista sa tinaguriang “Huli Week,” 26 Lumad na estudyante at mga guro sa Bakwit School sa Cebu, at 30 Dumagat na pinapunta lamang sa presinto.

Tampok rin ang patuloy na pag-redtag sa mga tinataguriang “komunista” kabilang ang kaso ni Anna Patricia Non, pasimuno ng mga community pantry, mga unyon ng empleyado sa Senado at Korte Suprema at sa isang husgado sa Mandaluyong na nagbasura sa search warrant ng dalawang inarestong aktibista.

Sa kabila ng lahat ng ito, walang desisyon ang mga mahistrado kaugnay sa mahigpit at kagyat na hiling ng mga petisyuner na maglabas ng temporary restraining order (TRO) para pansamantalang ipatigil ang pagpapatupad ng batas. Ito ay sa kabila ng pagsentro ng mag mahistrado sa malawakan at iligal na gawi ng NTF-ELCAC na redtagging at pagkwestyon nila sa awtoridad ng Anti-Terror Council na magpangalan ninuman o anumang organisasyon bilang mga “teorista” nang walang karampatang proseso.

Sa halip, kinastigo lamang ng korte ang isa sa mga petisyuner na nagpahayag sa social media ng disgusto sa testimonya ni Gen. Hermogenes Esperon, hepe ng National Security Agency sa huling araw ng oral argument, kung saan sa mismong harap ng Korte Suprema ay inulit ang pag-redtag sa mga ligal na organisasyong patriyotiko at demokratiko. Animo’y sampal sa korte, kinabukasan ay naglabas ang ATC ng listahan ng mga tinagurian nitong terorista. Kabilang sa listahan na ito ang 19 indibidwal na karamihan mga konsultant sa usapang pangkapayapaan.