Tubong-Davao, ipinanganak si Ka Karl noong Nobyembre 1969 at nagmula sa uring petiburgesya. Nag-aral siya sa kursong BS Civil Engineering sa Ateneo de Davao University. Mula sa pagiging aktibista, naging kasapi siya ng Partido noong 1986 at naglaan ng buong-panahon para sa Partido mula 1988.

Nagsilbi siyang pinuno sa iba’t ibang mga komite at antas ng Partido sa Southern Mindanao at buong Mindanao noong 1988 hanggang 2008. Nadakip siya ng mga pwersa ng estado noong Pebrero 2008. Nakalaya siya noong 2016 at nagsilbing isa sa mga konsultant ng National Demoratic Front of the Philippines sa negosasyong pangkapayapaan. Kasunod ng pagbasura ng rehimeng US-Duterte sa negosasyong pangkapayapaan, sa Cagayan Valley na kumilos si Ka Karl kung saan naitalaga siyang kalihim ng Komiteng Probinsya ng Partido sa Cagayan simula Agosto 2018 at naging kagawad ng Komiteng Tagapagpaganap ng Komiteng Rehiyon hanggang gumanap sa Kalihiman ng Komiteng Rehiyon noong 2021.

Sadyang pinatay si Ka Karl, kasama sina Ka Seed at Ka Jorly, habang nagsasagawa ng konsultasyon a masang magsasaka sa Sityo Pallay, Barangay Baliuag, Peñabalanca, Cagayan noong Setyembre 11, 2024.