Napanday bilang isang mahusay na pampulitikang instruktor at pulang kumandera si Ka Lunti sa gitna pinakamalupit na teroristang aksyon ng apat na magkakasunod na rehimen mula kay Arroyo hanggang sa kasalukuyang panunumbalik ng rehimeng Marcos Jr.

Isa na si Ka Lunti sa masasabing haligi ng Yunit ng Sierra Madre. Sa mahabang panahon, tumayo syang kalihim ng Sangay ng Partido sa Platun (SPP) at kagawad ng Komiteng Tagapagpaganap ng Komiteng Larangang Gerilya (KT-KLG). Bilang Pampulitikang Instruktor (PI), matyaga siyang naglilinaw sa mga kasama ng mga batayang prinsipyo, pormal o impormal mang mga talakayan.

Namartir siya, kasama ng siyam pang mandirigma, sa isang depensibang labanan, kung saan gumamit ang militar ng mga helikopter at drone, sa Barangay Malbang, Pantabangan, Nueva Ecija, noong Hunyo 26, 2024.