Namartir sina Ka Arya, Ka Mike at Ka Ricky sa isang labanan noong Marso 26, 2024 sa Brgy. Elvita (Tubahan), Rosario, Batangas.

Tubong Lipa City, Batangas, nagmula si Ka Arya, 37 anyos, sa uring mababang petiburgesya. Namulat siya sa militanteng kilusan ng kabataang-estudyante sa Maynila noong 2004 sa unang taon niya sa kolehiyo. Naging tinig ng iba���t ibang sektor si Junalice at malakas na itinambol ang mga isyu ng mga magsasaka at manggagawang bukid sa tubuhan, ng mangingisda, ng manggagawa, maralitang lungsod, mga biktima ng kalamidad.

Dahil sa matinding banta ng estado sa kanyang buhay, napilitang kumilos nang lihim si Ka Arya hanggang sa noong Agosto 2015 ay nagpasya siyang sumampa na sa Hukbo upang lumahok sa armadong pakikibaka. Nobyembre 2016 nahalal siyang kagawad ng Pamprobinsyang Komite ng Partido sa Batangas at naging kagawad ng istap nito sa edukasyon, propaganda at kultura (EPK). Pinangunahan niya ang pagsusulat at paglalathala ng pamprobinsang pahayagan ng Partido na Lagablab ng Batangan at mga gawaing pamamahayag sa probinsya. Mahusay din siyang manunulat ng tula sa likod ng mga pangalang Adel Serafin, Belinda Bukirin, Ka Minda, Ka Enya.