Liwat na naman nga naglumbayag nga daw mga ido buang ang mga terorista nga militar sang 12th kag 82nd Infantry Battalion sa mga kabaryohanan sang Lambunao kag Calinog sa Iloilo, Libacao sa Aklan kag Valderama kag Bugasong sang Antique.

Sa ila tayuyon nga operasyon nga ginalunsar halin sa bulan sang Abril tubtob Hulyo subong nga tuig wala untat nga nagapanglugas kag nagapang-kugmat ang mga berdugo nga militar sa pumuluyo nga mga mangunguma sa tunga sang nagapadayon nga gutom nga ginaantus tuga sang El Niño phenomenon.

Adlaw-adlaw nga nagapakadto pakari ang mga tropa sang militar sa mga talon kag ulumhan nga padayon nagatuga sang kahadlok sa mga mangunguma nga mag obra sang ila uma, magpangalap uway kag banban, magpangayam ukon magpanulo sang pagkaon bangud sang madamuan nga presensya sang militar.

Ginpanggabot sang mga tropa sang 12th IBPA ang mga tanom nga palawan nga kararuton nga tani pangsapin-sapin sa gutom sang pumuluyo kag ginpanglasak ang mga tanum nga palay sa Barangay Dalagsaan, Libacao, Aklan sini lang nga Hunyo.

Halin Hunyo asta subong gina-blokeyo sa pagkaon sang mga militar ang mga pumuluyo sa kaumhan paagi sa pagbaluskay kag paglimita sa ila ginadalawat nga bugas kag ginabakal nga mga pagkaon halin sa sentrong baryo kag banwa.

Imbis alibyohan ang gutom nga ginaantus sang mangunguma kag pumuluyo, amo ini ang nangin solusyon sang Rehimeng US-Marcos nga nagadugang sang agrabyo kag nagadabok sang kaakig sang mga mangunguma sa militar kag gobyerno ni Marcos.

Sa sini nga kabangdanan, mabaskug ang basehan sang pumuluyo agud usuyon ang rebolusyonaryong banas labi na ang armadong paghimakas upod sa Bagong Hukbong Bayan nga suldado sang mga imol kag ginadaog-daug. Pamatuod sini ang padayon nga suporta sang mga mangunguma kag pumuluyo sa NPA samtang nagapautwas kag naga-report sang kahalitan sang militar sa ila.

Gani, nagapanawagan ang NPA sa mga mangunguma kag pumuluyo nga pangibabawan ang kahadlok kag ibuhos ang tanan nga agrabyo kag kaakig sa teroristang militar kag angkunon ang hustisya paagi sa pagpanukot sa gobyernong Marcos sa iya kapabayaan.

Handa ang NPA nga makigbuligay sa tanan nga biktima sang kahalitan sang AFP agud silutan ang mga berdugo nga militar.

Pumuluyo isulong kag pabaskugon ang armadong paghimakas!
Pamatan-on mag-entra sa NPA!