Ginapadayaw sang reaksyonaryo nga gobyerno ni Marcos Jr kag sang iya alipores diri sa isla sang Negros kag sang idu-ido nga Armed Forces of the Philippines (AFP) ang 210 ka indibidwal nga nag-aplay sang amnestiya sa National Amnesty Commission (NAC) paagi sa Local Amnesty Board sa Bacolod City halin Hulyo 8 tubtob Hulyo 12. Bongga ang nangin okasyon sang ila ginhimo nga palagwaon agud mapakita sa publiko nga epektibo ang ila programa sang kontra-insurhensiya. Wala sang kamatuoran ang ini nga mga deklarasyon.

Halin sang gintukod ang NTF-Elcac, nangin numero uno ini nga gatasan sang mga opisyal sang militar kag sang mga burukrata ilabi na kay Marcos Jr para sa korapsyon. Ang Enhanced Comprehenesive Local Integration Program (E-CLIP) kag Barangay Development Program (BDP) ang pipila sa mga pamaagi agud makabulsa sila sang minilyon nga pondo halin sa manggad sang pumuluyo.

Laba na ang listahan sang mga kaso sang pilit nga pagpasurender sang AFP sang mga sibilyan bisan indi sila mga katapo sang New People’s Army (NPA). Ginapahug sang militar ang pumuluyo nga pasakaan sang himo-himo nga mga kaso ukon patyon agud sila mapilitan nga magsurender. Ginahatagan lang ang mga surenderi sang mumho nga Php5,000-Php10,000 nga kwarta, mga de-lata nga pagkaon, 10 ka kilo nga bugas, kag mga noodles samtang ginabulsa sang mga opisyal sang militar kag sang mga burukrata sang reaksyonaryo nga gobyerno ang masobra PHP40,000 nga nakatigana para sa kada surenderi sa idalom sang ila programa nga E-CLIP. Samtang wala man nagakahubas ang mga kikbak nga ila makuha sa mga farm-to-market roads kag iban pa nga mga programa sa idalom sang BDP.

Ginahimo man nga tigpangapin ang AFP kag Philippine National Police (PNP) sang mga propyedad kag proyekto sang mga dumuluong, kahimbon ang mga lokal nga dalagku nga komprador kag mga burukrata kapitalista agud mapasulod ang mga kontra-pumuluyo nga mga neoliberal nga mga proyekto ilabi na diri sa sur nga bahin sang Negros kaangay sang oil palm, mina kag mga reklamasyon sang kadutaan.

Wala sang bisan isa sa mga surrenderi ang matuod nga ginagarantiyahan sang reaksyonaryo nga gobyerno sang amnestiya. Imbes nga irespeto kag ibalik ang ila mga kinamatarung sibil, bulnerable, kag sa madamo nga kaso, ginahimo pa sila nga espiya, impormer, kag giya sa panahon sang mga operasyon kombat kag Retooled Community Support Program (RCSP) sang AFP. Pilit man sila nga ginapatrabaho pareho sang tigdul-ong sang suplay kag suluguon kon sila nagaoperasyon sa lokalidad. Pinakatingkad nga kaso dire sa Sur sang Negros ang pagpatay kay Jonel “Umi” Bayno Jr sadtong 2023 kon diin gindala siya sa Baktolon detatsment sa Barangay Camindangan, Sipalay City, Negros Occidental kag pagkatapos ginpatay kag ginwigit ang iya patay nga lawas sa kilid sang dalan sa Sityo Crossing Maoy sang nasambit nga barangay.

Peke nga amnestiya ang ginapatuman sang korap kag kontra-pumuluyo nga gobyerno ni Marcos Jr kag sang lunod-patay nga AFP-PNP kag NTF-Elcac. Makatarunganon lang nga ipanawagan sang pumuluyo nga bungkagon na ang NTF-Elcac kag itigana ang pondo para dire sa mga serbisyo sosyal sang pumuluyo pareho sang pagpauswag sa sektor sang agrikultura, pagpataas sang sweldo kag benepisyo sang mga mamumugon, pagpanubo sa presyo sang mga balaklon, libre nga edukasyon, pabalay, kag serbisyo sa ikaayong lawas kag iban pa nga mas labi nga kinahanglanon sa subong nga krisis.

Indi bisan san-o man malutos sang nagahari nga sahi ang armado nga rebolusyon sa aton nga pungsod. Bangud sa nagalala nga krisis subong sa ekonomiya kag pulitika, magadamo pa ang magasampa sa NPA. Indi masabat kag mabayluhan sang peke nga amnestiya ang makatarunganon nga paglunsar sang inaway banwa. ###