Saan a bumaba iti 13 nga amado nga aksyon ti insayangkat ti People’s Liberation Army ti Partido Komunista ti India (CPI)-Maoist manipud Enero inggana Marso itatta a tawen.

Innem kadagitoy ket operasyon a demolisyon kontra iti agop-operasyon a paramilitar ken makinarya a ramit iti konstruksyon. Ti kaudian ket panangpabettak iti maysa a bus a nakatayan ti lima nga elemento ti District Reserve Guard (DRG) idiay Nayaranpur District idi Marso 23. Ti DRG ket puersa a paramilitar nga impatakder ti estado ti India idi 2017 tapno pokusan ti armado a panaglaban ti CPI-Maoist. Maipareho daytoy a puersa iti CAFGU iti Pilipinas.

Dadduma pay nga aksyon ti CPI-Maoist kontra kadagiti proyekto a kalsada ti panangparalisa iti makinarya iti konstruksyon idiay Logarda District idi Enero 16, Bahaglat District idi Enero 31 ken idiay Gadchiroli District idi Enero 27.

Dagitoy a kalsada ket paset ti proyekto nga imprastraktura a maaw-awagan a Road Connectivity Project para iti Left Wing Extremism Affected Areas, (Maipada daytoy iti “farm to market road” ti NTF-ELCAC iti Pilipinas iti sidong ti Barangay Development Program.) Paset daytoy iti programa a kontra-insurhensiya a rinugian ti gobyerno ni Narendra Modi idi 2016.

Kadakkelan a parte ti pondo para iti kalsada ket aggapu iti sentral a gobyerno. Kasukat ti pondo, inobliga ti gobyerno ni Modi nga ipatungpal dagiti lokal nga estado ti tallo a reporma iti agrikultura maipapan iti panangilako kadagiti produkto nga agrikultural, panagpaabang ti daga ken contract growing a nakarintar a naipasa idi Oktubre 2020. Dagitoy a reporma ti sentro ti protesta a nakipasetan ti saan a bumaba iti 250 milyon a mannalon a nangrugi idi Nobyembre 2020 ken agtultuloy inggana iti agdama.