Ha sakob la hin tulo kasemana, duha kabeses nga ginbomba tikang ha kahanginan han terorista nga 8th Infantry Division an mga umhanan ha Western Samar.

Syahan ini nga nagpauran han bomba hadton Hulyo 7 ha bawnderi han San Jose de Buan ngan San Jorge. Tikang alas-2 han kaagahon tubtub maglamrag, waray wantas nga gimbombahan ngan gin-istraping han FA-50 nga fighter jet ngan Super Tucano nga idro an nasering nga lugar. Sige liwat an panganyon gamit an 105mm ngan 155mm howitzer ngan nagpapalupad han Hermes 900 nga drone. Hasta yana, mayda pa report han panganganyon.

Utro nga nanmomba an 8th ID hadton Agosto 1 dapit alas-2 han kulop ha usa pa nga umhanan apiki ha Barangay Bay-ang. Diri mamenos ha unom nga bomba an ginhulog han idro nga Super Tucano. Ginkukumpirma an mga report nga mayda mga parag-uma nga naigo dinhi.

Grabe nga kahadlok ngan peligro ha kinabuhi ngan pakabuhi han mga apiki nga sibilyan nga komunidad an ira pag-atake. Ginlilikaw naman ini ha publiko han numero uno nga pasista han 8th ID nga hi Major General Edgardo de Leon, nga nagsering nga engkwentro kontra ha Bagong Hukbong Bayan an nahitabo hadton Hulyo 7 ngan diri terorista nga panmomba.

Ha lista han Larab, ini nga pangatake ha Western Samar amo an ikaduha ngan ikatulo nga kaso han terorista nga panmomba tikang ha kahanginan yana nga tuig. Tikang 2019, walo kabeses na ginbombahan han 8th ID an kabaryuhan ha rehiyon. (Larab)