Usa nga mag-asawa nga mga retirado nga kadre han Partido ngan Bagong Hukbong Bayan an waray kaluoy nga ginpatay han pasista nga militar ha Western Samar. Samtang, gindakop ngan ginpagawas komo mga aktibo nga kaapi han BHB an upat nga indibidwal nga pira katuig na nga pinahuway ha serbisyo ha hukbo han katawhan.

Ginpatay han pasista nga 87th Infantry Battalion an mag-asawa nga hira Rodrigo Mejica Lorezo, nga mas kilalado komo Ka Akag ngan Ka Kute, ngan Delia Rosco Rotalano, nga kilalado komo Ka Mema ngan Ka Kanay, ha gin-uukyan nira nga balay ha Barangay Galutan, San Jose de Buan, Western Samar hadton Agosto 7. Diri ungod nga “inato” hira han ireyd ngan patayon hira han pasista nga militar. Subay ha iskrip han “Tokhang” nga pagpatay ha mga retirado nga rebolusyunaryo, ginpagawas han 87th IB nga armado nga engkwentro an nahitabo ngan “inato” an duha.

Usa ha mga pinakarespetado nga kumander han BHB ha Northern Samar hi Lorezo. Kilalado liwat nga kadre militar hi Rotalano. Hadton Pebrero 2020 pa hira nagretiro ha aktibo nga rebolusyunaryo nga buruhaton tungod ha kalagas nira ngan mga gin-aabat nga sakit. Butaray nga nagbibinuwa an 87th IB ha pagsering nga mayda higtaas pa gihapon nga katungdanan ha Partido ngan Hukbo an mag-asawa ha katuyuanan nga demoralisahon an hukbo han katawhan ngan masa.

Samtang, gindakop han diri mamenos ha 15 sundalo hira Dondon Cabigayan, 33, iya bugto nga hi Ramy Cabigayan, 23, ngan usa nga mag-asawa nga taga-Barangay Osmeña, Macarthur, Eastern Samar, ngatanan mga hadto anay kaapi han BHB. Gindakop hira hadton Marso 10 ha umhanan han magbugto ha Barangay Nabong, Pinabacdao, Western Samar dapit alas-6 han gab-i. Ginpapagawas han militar nga mga surenderi an upat nga biktima ngan nag-aantos hin dirudilain nga pagpakuri ha ira kamot, sanglit napipiritan nga magsunod ha mga kontra-katawhan nga mando ha ira. (Larab)