Apat ka mangunguma ang ginpatay sang Armed Forces of the Philippines (AFP) sa Masbate kag Negros Occiddental sadtong Mayo. Palareho sila nga ginpagwa nga katapo sang Bagong Hukbong Bayan nga napatay sa “engkwentro.” Nalista man sa nagligad nga bulan ang pag-aresto sa tatlo ka sibilyan, kabahin ang isa ka lapsag.

Pagpatay. Sa Masbate, ginpatay sang 96th IB ang 31-anyos nga mangunguma nga si Erlindo Natural sadtong Mayo 7 sa Barangay Holjogon, Mobo. Si Natural ang ika-29 nga biktima sang pampulitika nga pagpamatay sa prubinsya sa idalom sang rehimen Marcos.

Sa Negros Occidental, ginlusob sang indi magnubo sa 24 ka tropa sang 62nd IB ang balay sang pamilya dela Peña sa Sityo Inangaw, Barangay Quintin Remo, Moises Padilla sadtong Mayo 21 sang aga. Ginpaulanan ini sang bala bag-o iligal nga gin-aresto sang mga suldado si Richard dela Peña, ginpalayo sa iya balay kag hungod nga ginpatay.

Sadtong Mayo 22, hungod nga ginpatay sang suldado sang 79th IB ang mangunguma nga si Jeje Redobles sa Sityo Manaysay, Barangay Cambayobo, Calatrava. Si Redobles ang ordinaryo nga mangunguma sang kamote kag saging.

Sadto naman Mayo 30, apat ka igo sang bala ang nagpatay sa mangunguma nga si Jigger Bartolo sa Sityo Sangay, Barangay Hilub-ang Calatrava. Siya ang ginpatawag sang mga ahente sang 79th IB halin sa paglawig sang iya nga karabaw kag amo ginpatay.

Pag-aresto. Sa Masbate, gin-aresto sang mga pwersa sang estado si Tinay Ontog sa Barangay Maglambong, Monreal sadtong Mayo 18.

Sa wala natumod nga petsa, gin-aresto man sang mga pwersa sang estado si Baby Arnejo kag iya nga iloy sa Barangay Madao, Uson. Sa pagduso sang mga kabaryo, nabawi ang lapsag kag nabutang sa maayo nga kustodiya samtang napriso pa sa gihapon ang iya nga iloy.

Pag-abdak. Masobra duha ka bulan na nga nadula ang soltero nga si Joy Delica, 32 anyos, halin sang gin-abdak siya sang indi magnubo sa 30 ka suldado sang 4th ID sa balay nga iya ginadayunan sa Barangay New Compostella, Dumulog, Bukidnon sadtong Marso 18. Ginhigot ang mga kamot kag tiil ni Delica kag ginsakay sa salakyan sang mga suldado.

Gindumili-an sang mga suldado ang mga residente nga nagpamilit nga updan si Delica para masiguro ang iya nga kaluwasan. Tubtob subong, wala pa natultolan ang ginkahamtangan niya.