VFA, ibasura. Nagprotesta dagiti demokratiko nga organisasyon idiay Cebu City idi Mayo 27 tapno ipanawagan manen ti panangibasura iti Visiting Forces Agreement iti nagbaetan ti Pilipinas ken imperyalista a US. Kagiddan daytoy ti maika-25 tawen nga anibersaryo sipod inaprobaran ti Senado iti sidong ti turay ti rehimen nga Estrada ti nasao a katulagan idi Mayo 27, 1999. Ti Bagong Alyansang Makabayan-Central Visayas ti nangidaulo ti panagtignay.

Sardeng-pasada idiay Iloilo, naikasa. Nagsardeng-pasada dagiti drayber iti naawagan a “first town” wenno dagiti ili iti lawlaw ti Iloilo City idi Hunyo 3 tapno supyaten ti Local Public Transport Route Plan (LPTRP) ti syudad a manglimitar iti bilang ti dyip a sumrektoy. Nakaro a maapektaran dagiti drayber ken komyuter manipod kadagiti ili ti Leganes, Pavia, Oton ken San Miguel kadaytoy nga iskema. Ti LPTRP ket kanaig iti makagangannaet a PUVMP wenno jeepney phaseout. Naiduron da ti gobernador ti Iloilo a sangoen ida iti maysa a dayalogo idiay nga aldaw.

Kampuhan kontra komersyalisasyon idiay UP-Diliman. Nagirussuat ti kampuhan dagiti estudyante ti University of the Philippines (UP)-Diliman idi Mayo 30-31 tapno supyaten ti kumarkaro a komesyalisasyon ti pagadalan ken naikakeddeng a panaglukat ti baro a mall iti kampus na idiay Quezon City. Kadua da iti kampuhan dagiti agtagilako a nakaro nga apektaran ti panagserrek ti dadakkel a pribado a negosyo iti kampus. Sinabat da ti protesta idi Mayo 31 ti miting ti UP Board of Regents.

Mandatory ROTC, sarangeten. Nagprotesta dagiti agtutubo a Pilipino iti sango ti Senado idiay Pasay City idi Mayo 22 tapno ipalgak ti panagkedked da iti panangiyapura iti gakat a Mandatory Reserve Officers’ Training Corps iti nangato a konseho. Idi Abril, inpakaammo ti sumagmamano a senador ti plano da a mangaprobar iti nasao a represibo a gakat sakbay a malpas ti sesyon ti Senado.