Kinuwestyon ti Citizen’s Disaster Response Center Foundation (CDRC) ken Leyte Center for Development Enterprise, Inc. (LCDE) ti inpakat a “freeze order” ti Anti-Money Laundering Council kadagiti akawnt da iti banko. Nagpetisyon ti CDRC iti Court of Appeals idiay Quezon City idi Hunyo 2 bayat a ti LCDE idi Mayo 17 iti kapada a korte idiay Cebu City. Panggep da nga ipa-ikkat daytoy ken kariten ti ligalidad ti sangsyon a kunada ket saan a dimmalan iti umno a proseso, ken panaglabsing kadagiti karbengan iti nawaya a panagsao ken panagtataripnong.

Ti CDRC ken LCDE ket dua laeng kadagiti nakaad-ado a timpuyog a progresibo ken organisasyon para iti panagdur-as nga arbitraryo a naserbian ti kapada a “freeze order” kalpasan a maakusaran ti “terrorism financing.”

Daytoy a pananglipit ket maipasurot iti National Security Plan 2023-2028 nga inpablaak ti rehimen a Marcos. Nalawag a nakalanad ditoy ti pammilin a mangpasingked iti aksyon maibusor kadagiti akusaran na a ligal a prente ti “CPP-NPA-NDF tapno putden…ti paggappuan ti pinansya”. Siasinoman nga ikeddeng na nga addaan silpo iti rebolusyonaryo a tignayan ket basta-basta ken awanan-basaran a liplipiten daytoy.