Ginkwestyon sang Citizen’s Disaster Response Center Foundation (CDRC) kag Leyte Center for Development Enterprise, Inc. (LCDE) ang ginpapanaog nga “freeze order” sang Anti-Money Laundering Council sa ila nga mga akawnt sa bangko. Nagpetisyon ang CDRC sa Court of Appeals sa Quezon City sadtong Hunyo 2 samtang ang LCDE sadtong Mayo 17 sa pareho nga korte sa Cebu City. Katuyuan nila nga ipakakas ini kag hangkaton ang ligalidad sang sangsyon nga sa ila wala nag-agi sa husto nga proseso, kag lapas sa mga kinamatarung sa hilway nga pagpamahayag kag asosasyon.

Ang CDRC kag LCDe ang duha lang sa tuman kadamo na nga mga hugpong nga progresibo kag organisasyon pangkauswagan nga arbitraryo nga ginpapanaugan sang pareho nga “freeze order” pagkatapos gin-akusaran sang “terrorism financing.”

Ang pagpang-ipit nga ini ang nabalay sa ginpagwa sang rehimen Marcos nga National Security Plan 2023-2028. Lantad nga nahan-ay diri ang patakaran nga pabaskugon ang aksyon batuk sa gina-akusaran sini nga mga ligal nga prente sang “CPP-NPA-NDF para utdon… ang ginhalinan sang pinansya.” Ang sin-o man nga igatalana sini nga may kaangtanan sa rebolusyonaryong kahublagan ang basta na lang kag wala sang basehan nga gina-ipit.