Sundanay nga pagpamomba kag pag-atake ang ginlunsar sang Zionista nga Israel sa nauna sini nga gintumod nga “luwas nga lugar” sang Rafah, sa sur nga bahin sang Gaza, sugod sadtong ulihi nga semana sang Mayo. Ginpatuman ini sang Israel sa pihak sang panibag-o nga desisyon sang International Court of Justice, nagapanguna nga korte sang United Nations, sadtong Mayo 24 nga nagasugo nga “gilayon untaton ang opensiba militar, kag bisan ano pa nga iban nga aksyon sa Rafah.”

Sadtong Mayo 26, indi magnubo sa 49 katawo ang napatay kag 250 ang napilasan sa airstrike sang Israel sa “tent camp” (temporaryo nga lugar sang ebakwasyon) sa Al-Sultan sa Rafah. Duha ka adlaw ang nakaligad, ginbomba naman sang mga pwersang Israeli ang tent camp sa Al-Masawi sa Rafah nga nagpatay sa 21 ka Palestino kag nagpilas sa 64 katawo. Katunga sa mga biktima ang bata, babaye kag mga tigulang. Naabo ang temporaryo nga kampo nga ginadayunan sang mga nagbakwit sa Rafah nga himo lamang sa mga trapal.

Ang Rafah ang amo subong dalangpan sang masobra 1.5 milyon ka Palestino halin sang atakehon sang Israel ang Gaza sadtong nagligad nga tuig. Nagtukod sila diri sang mga hayob-hayob kag nagapuyo sa mga tent kung sa diin tuman ka kulang sa pagkaon kag bulong, kag makaluluoy ang kahimtangan sang mga nagbakwit.

Sadtong Hunyo 4, naglab-ot na sa 36,550 ang napatay, kabahin ang 15,000 ka bata, sa henosidyo sang Zionistang Israel samtang 82,959 ang napilasan. Ginatos ka linibo Palestino na ang natabog kag napalayas sa ila mga puluy-an.

Pilipino para sa Palestino

Nagapadayon ang suporta sang mga Pilipino sa mga Palestino sa atubang sang wala untat nga mga pag-atake diri sang Zionistang Israel.

Sadtong Mayo 30, nag-ululupod ang nagkalain-lain nga organisasyon masa sa University of the Philippines (UP)-Los Baños para suportahan ang paghimakas sang mga Palestino. Nagtigayon man sang martsa kag pagtililipon sa UP Diliman sadtong Mayo 19.

Samtang, nagpanawagan ang PUP for Palestine kay Quezon City Mayor Joy Belmonte kag ang Negrenses for Palestine kay Negros Occidental Governor Eugenio Lacson nga utdon ang pakig-angtanay nila sa mga upisyal sang Israel. Pagkatapos ini sang mga sinapol ni Belmonte kag Lacson sa mga upisyal sang Israel.

Sa Canada, nakig-isa ang mga grupo sang Pilipino sa protesta sadtong Mayo 29 sa Ottawa para ipanawagan ang imbestigasyon sa pagbaligya sang armas sang estado sang Canada sa Zionista nga rehimen sang Israel. Panawagan man nila nga ipasira ang CANSEC, ang tuigan nga arms show ukon baligyaanay sang armas sang Canadian Association of Defense and Security Industries, nga nagbukas sa Ottawa sa amo man nga adlaw.