VFA, ibasura. Nagprotesta ang mga demokratiko nga organisasyon sa Cebu City sadtong Mayo 27 para liwat ipanawagan ang pagbasura sa Visiting Forces Agreement sa tunga sang Pilipinas kag imperyalistang US. Kadungan ini sang ika-25 ka tuig nga anibersaryo halin sang ratipikahan sang Senado sa idalom sang rehimen Estrada ang nasambit nga kasugtanan sadtong Mayo 27, 1999. Ginpangunahan ang hublag sang Bagong Alyansang Makabayan-Central Visayas.

Untat byahe sa Iloilo, ginduso. Nag-untat byahe ang mga drayber sa ginatawag nga “first town” ukon mga banwa sa palibot sang Iloilo City sadtong Hunyo 3 para pamatukan ang Local Public Transport Route Plan (LPTRP) sang syudad nga magalimita sa isip sang dyip nga pasudlon diri. Tuman ka apektado ang mga drayber kag komyuter halin sa mga banwa sang Leganes, Pavia, Oton kag San Miguel sa iskema nga ini. Ang LPTRP ang kaangot sang makidumuluong nga PUVMP ukon jeepney phaseout. Natulod nila ang gubernador sang Iloilo nga atubangon sila sa isa ka dayalogo sa amo nga adlaw.

Kampuhan kontra komersyalisasyon sa UP-Diliman. Naglunsar sang kampuhan ang mga estudyante sang University of the Philippines (UP)-Diliman sadtong Mayo 30-31 para pamatukan ang nagalala nga komersyalisasyon sang buluthuan kag nakatalana nga pagbukas sang bag-o nga mall sa kampus sini sa Quezon City. Upod nila sa kampuhan ang mga manogbaligya nga lubha nga maapektuhan sang pagsulod sang dalagko nga pribado nga negosyo sa kampus. Ginsugata nila sang protesta sadtong Mayo 31 ang sinapol sang UP Board of Regents.

Mandatory ROTC, batuan. Nagprotesta ang mga pamatan-on nga Pilipino sa atubang sang Senado sa Pasay City sadtong Mayo 22 para ipahayag ang ila pagpamatok sa pagratsada sa sugyot nga Mandatory Reserve Officers’ Training Corps sa mataas nga kapulongan. Sadtong Abril, ginpadayag sang pila ka senador ang plano nila nga pagratsada sa nasambit nga pagpanumpo nga sugyot bag-o matapos ang sesyon sang Senado.