Agsasaruno a panagbomba ken panangraot ti inrussuat ti Zionista nga Israel iti damo a dinakamat na a “natalged a lugar” ti Rafah, iti abagatan a paset ti Gaza, manipud idi maudi a lawas ti Mayo. Inaramid daytoy ti Israel iti laksid ti baro a desisyon ti International Court of Justice, kangrunaan a korte ti United Nations, idi Mayo 24 a nangimandar a “dagos nga isardeng ti opensiba a militar, ken uray ania pay a sabali nga aksyon idiay Rafah.”

Idi Mayo 26, di kumurang iti 49 tattao ti napapatay ken 250 ti nasugatan iti airstrike ti Israel iti “tent camp” (temporaryo a lugar ti ebakwayon) idiay Al-Sultan idiay Rafah. Dua nga aldaw kalpasan na, binomba met dagiti pwersa nga Israeli ti tent camp idiay Al-Masawi idiay Rafah a pimmatay iti 21 Palestino ken nangdangran iti 64 a katao. Kagudua kadagiti biktima ket ubbing, babbai ken nataengan. Dimmapo ti temporaryo a kampo a pasig nga aramid kadagiti trapal a nagnaedan dagiti pimmanaw idiay Rafah.

Ti Rafah ket agdama nga agipatpatalinaed iti nasurok 1.5 milyon a Palestino sipod idi rinaot ti Israel ti Gaza idi napalabas a tawen. Nangibangon da ditoy kadagiti kalapaw ken nagnaed kadagiti tent no sadino nga agkurkurang ti taraon ken agas, ken nakaay-ay-ay ti kasasaad dagiti naglibas.

Idi Hunyo 4, agdagupen iti 36,550 ti napapatay, karaman ti 15,000 nga ubbing, iti henosidyo ti Zionista nga Israel bayat nga 82,959 ti nasugatan. Ginasot a ribo a Palestino ti naabog ken napapanawen kadagiti pagtaengan da.

Pilipino para iti Palestine

Agtultuloy ti suporta dagiti Pilipino kadagiti Palestino iti sango ti di agsarday a panagraot ditoy ti Zionista nga Israel.

Idi Mayo 30, nagkaykaysa ti nadumaduma nga organisasyon ti masa idiay University of the Philippines (UP)-Los Baños tapno suportaran ti pannakidangadang dagiti Palestino. Adda met panagmartsa ken panagtataripnong idiay UP Diliman idi Mayo 19.

Kabayatan na, kiniddaw ti PUP for Palestine kenni Quezon City Mayor Joy Belmonte ken ti Negrenses for Palestine kenni Negros Occidental Governor Eugenio Lacson a putden ti pannakisilpo da kadagiti opisyal ti Israel. Kasaruno daytoy dagiti miting ni Belmonte ken Lacson kadagiti opisyal ti Israel.

Idiay Canada, nakimaymaysa dagiti grupo a Pilipino iti protesta idi Mayo 29 idiay Ottawa tapno kiddawen ti imbestigasyon iti panaglako ti armas ti estado ti Canada iti Zionista a rehimen ti Israel. Kiddaw da met nga iserra ti CANSEC, ti tinawen nga arms show wenno linnakuan ti armas ti Canadian Association of Defence and Security Industries, a naglukat idiay Ottawa kadaydiay nga aldaw.