Papaayen ti New People’s Army (NPA) ken ti masa a mannalon kadagiti ili ti Maria Aurora ken Dipaculao idiay Aurora ti di-agsarday a focused military operation ti 91st IB ken 84th IB agsipod pay idi Mayo. Di kumurang a pito a soldado ti natay idinto a dua pay ti nasugatan iti tallo a nagsasaruno a pannakiranget da iti armada ti umili.

Napasamak ti umuna a ranget idiay Barangay Toytoyan, Dipaculao idi Mayo 20, a sinaruno ti panaglalaban idiay Barangay Salay, Dipaculao idi Mayo 21 ken maysa pay idi Mayo 28 idiay Barangay Bazal, Maria Aurora. Militante a limmaban ti armada ti umili ken sitatalged a nakamaniobra.

Sobra-sobra a puersa a militar ti igabgabur itatta ti Armed Forces of the Philippines (AFP) iti dua nga ili tapno tuntunen ti ibagbaga da a “manmano” laengen a mannakigubat ti NPA. Agar-aramat ti AFP kadagiti helikopter, drone ken dadduma pay a superyor nga armas para kadagiti kombat nga operasyon na.

Idi Mayo 20-21, dua nga helikopter ti inaramat ti 91st IB a nanglikmut iti innem a barangay idiay Dipaculao. Simmaruno a linikmutan da ti tallo a barangay idiay Maria Aurora no sadinno a nangitinnag da kadagiti bomba kadagiti talon. Kanayonan na pay, nagpatudo ti bala ti 91st IB. Naipadamag a maysa nga agtutubo ti natay gapo iti dayta.

“Imbes a ti pondo ti umili ken ipamaysa iti panangipaay iti de kalidad a serbisyo publiko, minilyon a pondo ti busbusbusen ti AFP kadagiti agtultuloy a kombat nga operasyon,” kuna ti NPA-Aurora.

Dagitoy nga operasyon ti AFP ket mangyeg iti nakaro a dislokasyon ken terorismo kadagiti sibilyan a populasyon. Agtultuloy a maparitan ida nga agtrabaho iti baryo ken kabambantayan.

Iti rekord ti Department of Social Welfare and Development idi Mayo 25, agdagop iti 3,633 a pamilya ti naapektaran iti di-agsarday a kombat nga operasyon ti AFP iti lugar.