Ginpaslaw sang Bagong Hukbong Bayan (BHB) kag sang masang mangunguma sa mga banwa sang Maria Aurora kag Dipaculao sa Aurora ang wala-untat nga focused military operation sang 91st IB kag 84th IB sugod pa sadtong Mayo. Indi magnubo sa pito ka tropa ang napatay samtang duha ka iban pa ang napilasan sa tatlo ka sundanay nga engkwentro sini sa hukbong bayan.

Nahitabo ang una nga engkwentro sa Barangay Toytoyan, Dipaculao sadtong Mayo 20, ginsundan sang inaway sa Barangay Salay, Dipaculao sadtong Mayo 21 kag isa pa sadtong Mayo 28 sa Barangay Bazal, Maria Aurora. Militante nga nagbato ang hukbong bayan kag luwas nga nakamaniobra.

Sobra-sobra nga pwersa militar ang ginbubo subong sang Armed Forces of the Philippines (AFP) sa duha ka banwa para lagson ang ginahambal nila nga “pipila” na lang ka mga hangaway sang BHB. Nagagamit ang AFP sang mga helilkopter, drone kag iban pa nga superyor nga armas para sa mga operasyon kombat sini.

Sadtong Mayo 20-21, duha ka helikopter ang gingamit sang 91st IB sa paglibot-libot sa anom ka barangay sa Dipucalao. Sunod sini nga ginlibutan ang tatlo ka barangay sa Maria Aurora kung sa diin naghulog sila sang mga bomba sa mga bukid. Dugang diri, nagpaulan sang bala ang 91st IB, nabalita ang pagkapatay sang isa ka pamatan-on tungod diri.

“Sa baylo nga ibutang ang pondo sang banwa sa paghatag sang de kalidad nga serbisyo pampubliko, nagagasto ang AFP sang minilyon nga pondo sa padayon nga mga operasyon kombat,” pahayag sang BHB-Aurora.

Tuman nga dislokasyon kag terorismo ang ginadala sang mga operasyon nga ini sang AFP sa sibilyan nga populasyon. Padayon sila nga ginadumilian nga makapangabuhi sa baryo kag kabukiran.

Sa rekord sang Department of Social Welfare and Development sadtong Mayo 25, naglab-ot sa 3,633 ka pamilya ang naapektuhan sang wala-untat nga operasyon kombat sang AFP sa lugar.