Ginapadayaw kasan-o lang sang Department of Agrarian Reform (DAR) nga 2,046 ka residente sang Palawan ang nahatagan sang CLOA (Certificate of Land Ownership Award) kag mga makinarya panguma. Gintigayon ang seremonya sang pagpanagtag sa PGP Convention Centre, Palawan sadtong Abril 11. Gintambungan pa ini sang tiglikom sang departamento kag matag-as nga upisyal sang prubinsya.

Ang matuod, palagwaon lang ang pagpanagtag sang CLOA. Sandig sa isa ka nagtambong, “photo ops” ukon papiktyur lang ang nahitabo. Ang mga CLOA nga ginpanagtag ang wala napangalanan sa mga ginhatagan sini. Indi man mismo ang duta nga ila ginatalauma ang nabutang nga duta sa papel nga ginpanagtag. Mas malala, “recycle” ukon ginsulit lang ang pagpanagtag tungod madugay na nga may uyat nga CLOA ang mga mangunguma nga ginpatambong.

“Wala ako nagtambong, wala ko man ginkuha ang CLOA nga indi sa akon nakapangalan, kag wala man ko nag-upod sa pagpapiktyur,” panaysayon sang isa ka iloy nga gin-imbita sa palagwaon nga pagpanagtag. Indi siya luyag nga magamit sa pagpanginto sang DAR.

Isa ka upisyal sang kooperatiba sang palm oil ang nabiktima sang pagpanginto kag nagbaton sang CLOA nga indi sa iya nakapangalan. “Naga-usik lang sang kwarta ang gubyerno, para lang ihambal nga nanagtag sang duta,” hambal niya. “Ang CLOA namon ang panahon pa ni Ramos ginpanagtag.”

Estilo nga “hakot” ang ginhimo sang DAR para sa palagwaon nga pagpanagtag. Ginsabat tanan sang departamento ang galastuhon sang panggwa, kabahin ang pakadto-pabalik nga plete sang mga “benepisyaryo” nga naghalin pa sa layo nga mga munisipalidad. Baha man ang pagkaon kag pamahaw. Nanagtag pa diri sang mga t-shirt nga may nakatatak nga “Sariling Lupa para sa Bagong Bukas nga Masagana” nga may mga nawong ni Ferdinand Marcos Jr.

“Abot na ang pagpagwapo ni Marcos Jr,” sandig sa mga mangunguma.