Inlastog iti nabiit ti Department of Agrarian Reform (DAR) a 2,046 a residente ti Palawan ti naikkan ti CLOA (Certificate of Land Ownership Award) ken dagiti makinarya a pangtalon. Naaramid ti seremonya ti panagibunong idiay PGP Convention Centre, Palawan idi Abril 11. Dinar-ayan pay daytoy ti kalihim ti departamento ken nangangato nga opisyal ti probinsya.

Kinapudno na, panaginkukuna laeng ti panagibunong ti CLOA. Segun iti maysa a dimmar-ay, “photo ops” wenno pangletrato laeng ti napasamak. Dagiti CLOA a naibunong ket saan a nakanagan kadagiti nakaitedan dagitoy. Saan met a ti mismo a daga a nagmulaan da ti nakalanad a daga iti papel a naibunong. Nakarkaro pay, “recycle” wenno maulit-ulit laeng ti panagibunong gapo ta nabayagen a nakaiggem ti CLOA dagiti mannalon a napadar-ay.

“Saanak a dimmar-ay, saan ko met nga innala ti CLOA a saan a nakanagan kanyak, ken saanak met a kimmuyog iti panagpiktyur,” istorya ti maysa nga inang a naimbitaran iti pakulo a panagibunong. Saan na a kayat a paaramat iti panangloko ti DAR.

Maysa nga opisyal ti kooperatiba ti palm oil ti nabiktima ti panangloko ken immawat ti CLOA a saan a nakanagan kenkuana. “Agsay-sayang laeng ti kwarta ti gobyerno, tapno laeng maibaga a nagibunong ti daga”, kunana. “Ti CLOA mi ket panawen pay ni Ramos a naibunong.”

Estilo a “hakot” ti inaramid ti DAR para iti pabuya a panagibunong. Binaklay amin ti departamento ti gastos iti pabuya, karaman ti plete dagiti “benepisyaryo” a naggapo pay iti nagga-adayo a munisipalidad. Naglayos met ti makan ken meryenda. Nagibunong da pay ditoy kadagiti t-shirt nga adda nakamarka a “Sariling Lupa para sa Bagong Bukas na Masagana” nga addaan rupa ni Ferdinand Marcos Jr.

“Nakakadkadlaw ti panagpapogi ni Marcos Jr,” kuna dagiti mannalon.