Sa espiritu sang kahublagan panadlong nga ginalunsar sang Partido komunista ng Pilipinas sa bilog nga pungsod, ubos kusog nga ginasulong sang tanan nga rebolusyonaryong pwersa sa mga prubinsya sang Southern Tagalog ang nagkalain-lain nga aspeto sang mga hilikuton. Bug-os pagpaninguha nga ginalunsar sang mga yunit sang Bagong Hukbong Bayan (BHB) ang liwat nga pagbalik sa mga lugar nga madugay na nga nabayaan agud liwat nga makonsolida ang baseng masa kag labi pa nga pabakuron ang mga ini sa tunga sang ginpabaskog nga atake sang kaaway.

Isa ang Bagtuan sa mga lugar nga ini. Manggaran sa rebolusyonaryong kasaysayan ang baryo amo nga isa ini sa nangin pokus nga barangay sang National Task Force (NTF)-Elcac. Biktima ang pumuluyo sa lugar sang madamo nga pwersahan nga pagpasungka, pisikal kag mental nga tortyur, pagpamahog, harassment kag intimidasyon. Halos wala untat man sa nagligad nga lima ka tuig ang focused military operations (FMO) kag Retooled Community Support Program Operations (RCSPO) sang berdugo nga militar kag pulis agud wasakon ang rebolusyonaryong pag-isa sang masa diri.

Nagahana nga ipasulod sa Bagtuan ang pila ka peke kag mapanghalit nga mga proyekto pangkauswagan lakip ang pagmina sa kabukiran. Pagagub-on sini ang mga kaingin, humayan kag mga lugar puluy-an sang masa nga naangkon nila tungod sa madinalag-on nga rebolusyon agraryo nga ginsulong sang masa sa lugar, katimbang ang BHB.

Apang, wala natay-og ang masa sa Bagtuan sa mga pagpang-atake kag pagpangwasak sang mga berdugo. Lubos ang kalipay nila nga ginsugata ang liwat nga pagbalik sang yunit sang BHB sa lugar bisan nga may RCSPO nga naka-istasyon sa isa sa mga komunidad nga sakop sini.

Gilayon nga gintigayon sang yunit sang BHB ang pakigsinapol sa mga yabi nga masa sa lugar para liwat nga ihan-ay ang mga rebolusyonaryong hilikuton. Paagi sa pagtinguha sang masa kag sang yunit, nalunsar ang serye sang mga pagtuon sang Saligang Batas ng Partido, Programa sa Pambansa Demokratikong Rebolusyon, kag pahayag sang KTKS sa ika-55 nga anibersaryo sang Partido. Madamo sa mga daan nga pwersa sang sanga sang Partido sa lokalidad (SPL) ang liwat nanumpa sa Partido para liwat nga pabakuron ang ila panindugan.

“Indi masarangan nga bag-uhon sang kaaway ang amon panindugan sa Partido kag BHB bisan pa pila ka sulit sila nga mag-operasyon sa lugar para pahugon kami,” pahayag ni Tatay Ipe, tiglikom sang SPL.

Amo man, madamo sang bag-o nga katapo ang napasumpa, pamatuod nga wala nautod ang rebolusyonaryo nga palanubli-on nga naghalin pa sa mga nauna nga katapo sang Partido nga nagsulat kag nagsugod sang rebolusyonaryong tradisyon kag kasaysayan sa baryo.

“Bilang mga benepisyaryo sang rebolusyong agraryo, muklat kami sa katungdanan namon nga padayon nga maghulag sa Partido pareho sang amon mga katigulangan. Kon wala namon ini ginhimo, paga-agawon lang sang gubyerno ni Marcos ang amon mga kadutaan,” suno kay Jonas, isa ka pamatan-on nga bag-ong katapo sang Partido.

Tungod nga mas nga nahangpan sang masa ang hugot nga kakinahanglanon nga liwat kay-uhon ang organisasyon sang Partido nga amo ang magapamuno sa ila kahublagan masa, masunod nga gintigayon ang serye sang liwat nga pagtukod kag pakigsinapol sa mga sanga sang Partido sa mga baryo nga sakop sang Bagtuan. Paagi sini, gindihon ang mga plano sa ululupod nga pagdepensa kag paghulag sang masa sa lugar agud paslawon ang mga atake sang kaaway kag batuan ang anuman nga peke kag mapanghalit nga proyekto pangkauswagan nga tuyo ipasulod sa Bagtuan sang NTF-Elcac kag sang reaksyunaryo nga gubyerno. Gindihon man ang plano sa pagbuyok kag pagbinuligay sa pagtanom nga bilidhon sa panahon nga ini nga tigpananom sa mga kaingin kag tubigan.

Suno kay Tatay Ipe, “Yara sa aton kamot ang aton palaabuton. Mapangapinan lang naton ang aton kabuhi kag palangabuhian kon mabaskog ang Partido kag nagahiliugyon kita tanan.”

Pamatuod ang inagihan sang Bagtuan nga indi matuod ang ginapabugal sang rehimen US-Marcos kag sang mga pasista nga suluguon sini nga militar kag pulis nga sigurado na nga maubos subong nga tuig ang mga rebolusyonaryong pwersa sa bilog nga pungsod. Buhi nga halimbawa ini nga anuman ka pintas sang atake ang ilunsar sang kaaway, indi sini mahimo nga dugmukon ang rebolusyonaryong paghiliugyon sang masa kag Bagong Hukbong Bayan kag sang proletaryong Partido nga nagapamuno sa rebolusyon.