Sa diwa sa kalihukang pagtul-id nga ginalunsad sa Partido Komunista ng Pilipinas sa tibuok nasud, determinadong ginaasdang sa tanang rebolusyonaryong pwersa sa mga prubinsya sa Southern Tagalog ang nagkalain-laing aspeto sa mga gimbuhaton. Bug-os nga paningkamot ang gihimo sa mga yunit sa Bagong Hukbong Bayan (BHB) aron makabalik sa mga lugar nga dugay nang nabiyaan para subling makonsolida ang baseng masa ug labaw pa kining palig-onon taliwala sa gipagrabeng atake sa kaaway.

Usa ang Bagtuan sa maong mga lugar. Bahandianon sa rebolusyonaryong kasaysayan ang baryo maong kini ang usa sa mga pokus nga barangay sa National Task Force (NTF)-Elcac. Biktima ang katawhan sa lugar sa dinaghang pugos nga pagpasurender, pisikal ug mental nga tortyur, pagpanghulga, pagpanghasi, ug pagpanghadlok. Halos walay hunong usab sa milabayng lima ka tuig ang focused military operations (FMO) ug Retooled Community Support Program Operations (RCSPO) sa mga berdugong militar ug pulis aron pukanon ang rebolusyonaryong panaghiusa sa masa dinhi.

Gikabalak-ang ipasulod sa Bagtuan ang pipila ka mga mini ug magun-ubong mga proyektong pangkalamboan lakip ang pagmina sa kabukiran. Pagagub-on niini ang mga kaingin, talukan (humayan), ug mga gipuy-ang lugar sa masa nga nakuha nila tungod sa malampusong rebolusyong agraryo nga gipasiugdahan sa masa sa lugar, kaabag ang BHB.

Bisan pa man, wala nahadlok ang masa sa Bagtuan sa mga atake ug pagpamungkag sa mga berdugo. Daku ang ilang kalipay sa pagsugat sa pagbalik yunit sa BHB sa lugar bisan og adunay RCSPO nga nakaistasyon sa usa sa mga komunidad nga sakop niini.

Dihadiha nga gihimo sa yunit sa BHB ang pagtigum sa mga yaweng masa sa lugar aron iplastar balik ang mga rebolusyonaryong gimbuhaton. Pinaagi sa paningkamot sa masa ug sa yunit, nalunsad ang serye sa mga pagtuon sa Batakang Balaod sa Partido, Programa sa Nasudnon Demokratikong Rebolusyon, ug pamahayag sa KTKS sa ika-55 nga anibersaryo sa Partido. Daghan sa mga kanhi pwersa sa sangay sa Partido sa lokalidad (SPL) ang nanumpa balik sa Partido aron palig-onon ang ilang komitment.

“Dili kayang mabag-o sa kaaway ang among pagdapig sa Partido ug BHB bisan og makadaghang higayon pa silang mag-operasyon sa lugar aron kami hadlukon,” pamahayag ni Tatay Ipe, kalihim sa SPL.

Ingonman, daghang mga bag-ong myembro ang napasumpa, nga nagpamatuod nga dili maputol ang rebolusyonaryong manununod nga naggikan pa sa mga nag-unang myembro sa Partido nga nagkumpas ug nagpasiugda sa rebolusyonaryong tradisyon ug kasaysayan sa baryo.

“Isip mga benepisyaryo sa rebolusyong agraryo, matngon kami sa among katungdanan nga makanunayong molihok sa Partido sama sa among mga katigulangan. Kung dili namo kini buhaton, ilugon ra sa gubyerno ni Marcos ang among mga yuta,” ingon ni Jonas, usa ka batan-on nga bag-ong myembro sa Partido.

Tungod kay mas nasabtan sa masa ang hugot nga panginahanglang iplastar balik ang organisasyon sa Partido nga mangulo sa ilang kalihukang masa, sunod nga gihimo ang serye sa subling pagtukod ug pagtigum sa mga sangay sa Partido sa mga baryo nga sakop sa Bagtuan. Pinaagi niini, gitibuok ang mga plano sa hiniusang pagdepensa ug paglihok sa masa sa lugar aron mapugngan ang mga atake sa kaaway ug batukan ang bisan unsang mini ug magun-ubong proyektong pangkalambuan nga gustong ipasulod sa NTF-Elcac ug sa reaksyunaryong gubyerno sa Bagtuan. Gibuhat usab ang planong pagtinabangay ug kolektibong pagpananum sa mga kaingin ug basakan.

Sumala ni Tatay Ipe, “Naa sa atong mga kamot ang atong kaugmaon. Maprotektahan ra nato ang atong kinabuhi ug panginabuhian kung lig-on ang Partido ug nagkahiusa kitang tanan.”

Ang kasinatian sa Bagtuan nagpamatuod nga dili tinuod ang gipanghambog sa rehimeng US-Marcos ug sa mga pasistang itoy niini nga militar ug pulis nga siguradong mahurot na karong tuiga ang mga rebolusyonaryong pwersa sa tibuok nasud. Kini usa ka buhi nga pananglitan nga bisan unsang kabangis sa atake ang buhaton sa kaaway, dili nila mahimong pulbuson ang rebolusyonaryong panaghiusa sa masa ug Bagong Hukbong Bayan ug sa proletaryong Partidong nangulo sa rebolusyon.