![]( https://philippinerevolution.nu/wp-content/uploads/2021/11/protest-icon-1024x745.png )
Dagiti protesta
3,000 nga aguunas, nagrali idiay Batangas. Iti panangiyuna ti SUGAR-Batangas, nagummong ti 3,000 aguunas iti sango ti upisina ti DSWD idiay Batangas City idi Hulyo 10 tapno irupir ti panangited ti ayuda a nakalatang para kadakuada. Resulta ti panagtignay, inawat ti DSWD ti papeles ti maikalima a bats dagiti benepisyaryo nga immuna a nagkedkedan daytoy. Inallukoy dagiti mannalon ti insigida a pannakairuar ti ayuda.
Protesta para iti Palestine. Nasurok 300 kabataan ken estudyante manipud iti Baguio City ti dimmar-ay iti tignay para iti Palestine idi Hulyo 7 iti Malcolm Square iti syudad. Nagpiket met iti sango ti FEU ti Tamaraws for Palestine idi Hulyo 15 tapno iyebkas ti suporta da iti umili a Palestino. Dinillaw da ti agtultuloy a kampanya a henosidyo ti Zionista nga estado ti Israel, a suportado ti imperyalismo a US, laban kadagiti Palestino iti Gaza Strip.
Protesta laban iti RAA. Nagturong iti embahada ti Japan iti Pasay City idi Hulyo 8 ti Bayan ken Asia-Wide Campaign against US-Japanese Domination and Aggression of Asia tapno kundenaren ti panagpirma ti Pilipinas iti militar a katulagan a Reciprocal Access Agreement (RAA). Segun iti Bayan, ti katulagan ket maysa a napeggad nga addang ken agibunga ti pinakaro a militarisasyon ken risiris iti Asia-Pacific.
Panaguummong ken protesta laban iti NATO, naiyaramid iti US. Naguummong idi Hulyo 7 idiay Washington DC iti US ti 60 nga anti-imperyalista a grupo iti sidong ti Resist NATO (North Atlantic Treaty Organization) tapno ipanawagan nga isardengen dagiti gera ti US iti Ukraine ken dadduma pay a paset ti lubong, kasta met ti henosidyo daytoy iti Palestine. Nagmartsa da agturong iti White House. Sakbay daytoy, insayangkat dagiti grupo ti Resist NATO Summit a dinar-ayan ti 300 indibidwal. Inrana da dagitoy sakbay ti miting dagiti pagilyan a NATO iti Washington idi Hulyo 7-9 iti okasyon ti maika-75 anibersaryo daytoy.