NAGTIPON SADTONG HULYO 16 ang pila ka kilala nga indibidwal kag lider sa Santo Domingo Church Compound, Quezon City para sa isa ka talakayan kag agud magdala sang mabaskog nga mensahe sa rehimen Marcos kaangot sa estoryahanay pangkalinong. Sa amo nga adlaw, gintukod nila ang Council of Leaders for Peace Initiatives (CLPI) para iduso ang estoryahanay pangkalinong sa tunga sang Gubyerno sang Republika sang Pilipinas (GRP) kag National Democratic Front of the Phiippines (NDFP).

Ang CLPI ang gintukod sang mga akademiko, abogado, mga anay dekano, mga obispo kag lider sang nagkalain-lain nga simbahan, kag mga kilala nga tigtib-ong sang kalinong. Nagapanawagan ang grupo kay Marcos Jr nga magpahayag sang “maathag kag sigurado nga kagustohan nga isulong ang malinong kag nakasugtan nga solusyon sa madugay na nagaluntad nga armadong kinagamo” sa Pilipinas. Suno diri, ang makatarunganon nga kalinong ang kinahanglanon para sa mas mauswagon nga estado sang pungsod.

Gintum-ukan sang grupo ang kawad-on sang pasunod nga mga tikang kag aksyon pagkatapos sang ginpagwa nga Oslo Joint Statement sang GRP kag NDFP sadtong Nobyembre 23, 2023. Deklarasyon ini sang tuyo ukon kagustohan nga liwat buksan ang estoryahanay kag idihon ang balayon kon paano ini tigayunon.