![]( https://philippinerevolution.nu/wp-content/uploads/2024/07/202406.ilps-7th-international-assembly-1024x572.jpg )
Internasyunal nga anti-imperyalista nga asembliya, balligi a naangay idiay Malaysia
Balligi a naangay ti International League of Peoples’ Struggle (ILPS) ti maika-7 nga internasyunal nga asembliya daytoy manipud Hunyo 21 agingga 24 idiay Malaysia. Iti komunike nga inruar ti organisasyon idi Hulyo 11, inyulat daytoy a ti asembliya ket dinar-ayan ti 535 nga indibidwal manipud iti 44 a pagilyan. Ti 432 a delegado ket manipud iti 192 nga organisasyon a kameng ti ILPS bayat a ti 103 ket bisita ken agpaliiw.
Daytoy nga asembliya ket kadakkelan iti pakasaritaan ti liga. Segun iti komunike, sarming daytoy ti nakaro nga epekto dagiti imperyalista a krisis iti ekonomya, pulitika, militar ken klima iti intero a lubong ken ti pangngeddeng ti umili nga agkaykaysa ken makidangadang para iti maysa a naur-urnos a lubong.
Ti asembliya ket naluktan babaen ti diskurso ni Leila Khaled, mabigbig a mannakigubat a Palestinian manipud iti Popular Front for the Liberation of Palestine, panggep iti kinapateg ti rebolusyonaryo a pannakidangadang ti umili a Palestino laban iti US-Zionista nga agresyon ken okupasyon, kasta met ti kinapateg ti internasyunal a pannakipagkaykaysa ti umili a lumablaban. Sinaruno daytoy dagiti tagapagsarita kadagiti topiko ti nailian a wayawaya, sosyo-ekonomiko a panagdur-as, demokrasya iti panaglaban iti pasismo, ken nainkalintegan a kappia iti dangadang laban kadagiti gera nga agresyon.
Dagiti delegado ket nagbibinningay kadagiti kapadasan da a nagbalin a basaran ti panagiruar ti Pangkabuklan a Deklarasyon ti asembliya. Nagbotos da met kadagiti baro nga upisyal ti liga. Balbaliw a nabotosan kas pangulo ni Len Cooper manipud iti Australia ken pangkabuklan a kalihim a ni Azra Sayeed manipud iti Pakistan.
Pinadayawan da iti asembliya ni Kadwa Jose Maria Sison a nagserbi idi a chairman emeritus ti liga. Daytoy ti umuna nga internasyunal nga asembliya a naisayangkat manipud pimmusay isuna idi 2022.