MALAMPUSONG GIPAHIGAYON SA International League of Peoples’ Struggle (ILPS) ang ika-7 internasyunal nga asembliya niini gikan Hunyo 21 hangtud 24 sa Malaysia. Sa komunike nga gipagawas sa liga niadtong Hulyo 11, gipaabot niini nga ang asembliya gitambungan sa 535 ka indibidwal gikan sa 44 ka nasud. Ang 432 ka delegado naggikan sa 192 ka mga organisasyon nga myembro sa ILPS samtang 103 mga bisita ug obserber.

Kini ang pinakadakung asembliya sa kasaysayan sa liga. Sumala sa komunike, kini nagsalamin sa grabeng epekto sa mga imperyalistang krisis sa ekonomiya, pulitika, militar, ug klima sa tibuok kalibutan ug sa paghukum sa katawhan nga magkahiusa ug makigbisog alang sa usa ka mas maayong kalibutan.

Giablihan ang asembliya pinaagi sa pamulong ni Leila Khaled, iladong manggugubat nga Palestinian gikan sa Popular Front for the Liberation of Palestine, mahitungod sa kamahinungdanon sa rebolusyonaryong pakigbisog sa mga Palestinian batok sa agresyon ug okupasyon sa US-Zionista, ug ang importansya usab sa internasyunal nga pakighiusa sa katawhang nakigbisog. Gisundan kini sa mga topiko mahitungod sa nasudnong kagawasan, sosyo-ekonomikong paglambo, demokrasya sa pagbatok sa pasismo, ug makatarunganong kalinaw sa pakigbisog batok sa mga gubat agresyon.

Adunay mga workshop ug pagbinayloay og mga kasinatian sa mga delegado nga nahimong sumbanan sa pagpagula sa Pangkinatibuk-ang Deklarasyon sa asembliya. Nagpili usab og bag-ong mga upisyales ang liga. Subling nahapili isip lider niini si Len Cooper gikan sa Australia ug kinatibuk-ang kalihim niini si Azra Sayeed gikan sa Pakistan.

Giparangalan sa asembliya si Kaubang Jose Maria Sison, nga nagsilbing chairman emeritus sa liga. Kini ang unang internasyunal nga asembliya nga gipahigayon sukad sa iyang pagpanaw niadtong 2022.