MADINALAG-ON NGA GINHIWAT sang International League of Peoples’ Struggle (ILPS) ang ika-7 nga internasyunal nga asembliya sini halin Hunyo 21 tubtob 24 sa Malaysia. Sa komunike nga ginpagwa sang organisasyon sadtong Hulyo 11, ginbalita sini nga gintambungan ang asembliya sang 535 ka indibidwal halin sa 44 ka pungsod. Ang 432 ka delegado ang halin sa 192 ka mga organisasyon nga myembro sang ILPS samtang 103 ang mga bisita kag obserber.

Pinakadako ang asembliya nga ini sa kasaysayan sang liga. Suno sa komunike, dagway ini sang grabe nga epekto sang mga imperyalista nga krisis sa ekonomiya, pulitika, militar kag klima sa bilog nga kalibutan kag sang kabubut-on sang pumuluyo nga maghiliugyon kag maghimakas para sa isa ka maayo nga kalibutan.

Ginbuksan ang asembliya paagi sa pamulong-pulong ni Leila Khaled, bantog nga hangaway nga Palestinian halin sa Popular Front for the Liberation of Palestine, kabahin sa kabilidhon sang rebolusyonaryong paghimakas sang pumuluyong Palestino batuk sa US-Zionistang agresyon kag okupasyon, kag ang kabilidhon man sang internasyunal nga pag-isa sang pumuluyo nga nagapakigbato. Ginsundan ini sang mga tigpamaba sa mga topiko sang pungsodnon nga kahilwayan, sosyo-ekonomiko nga pag-uswag, demokrasya sa pagbato sa pasismo, kag makatarunganon nga kalinong sa paghimakas batuk sa mga gyerang agresyon.

May yara sang mga pagpanday kag baylohanay sang mga inagihan ang mga delegado nga nangin basehan sang pagpagwa sang Pangkabilogan nga Deklarasyon sang asembliya. Nagpili man sang bag-o nga mga upisyal ang liga. Liwat nga napili bilang pamunuan sini si Len Cooper halin sa Australia kag pangkabilogan nga tiglikom sini si Azra Sayeed halin sa Pakistan.

Ginpasidunggan sa asembliya si Kaupod Jose Maria Sison, nga nagserbe sadto nga chairman emeritus sang liga. Ini ang una nga internasyunal nga asembliya nga ginlunsar halin sang nagtaliwan siya sadtong 2022.