Naawagan nga “Oposisyon ti Umili,” inyanunsyo idi Hulyo 10 ti Koalisyong Makabayan ti plano daytoy a mangpataray ti 12 a kandidato iti kina-senador iti eleksyon 2025. Sibubukel ti pangngeddeng ti koalisyon a tumakder kas pudno nga oposisyon iti eleksyon a dominado dagiti paksyon ti agar-ari a dasig. Irepresentar daytoy ti interes ti ordinaryo nga umili iti Senado.

Indeklara ti koalisyon nga itandudo daytoy dagiti makaumili ken progresibo a kandidato na ti komprehensibo a nailian-demokratiko a programa a sumungbat iti “kalikagum ti umili a Pilipino para iti panagdur-as ti kaadwan, respeto iti karbengan, ken naan-anay a nailian a soberanya.”

Immunan nga inyanunsyo ni Rep. France Castro idi Hunyo 26 ti panagtaray na iti Senado iti sidong ti koalisyon, imet ti panawagan a “Titser met iti Senado.”

Dua a lawas laeng kalpasan daytoy, dagusen nga inatake isuna ti estado. Napatawan isuna ti saan a nainkalintegan a husga a nagbasol iti kaso a child abuse, karaman ni Satur Ocampo ken 11 pay iti natudingan a Talaingod 18. Nangrugi ti kaso iti panangtulong da kadagiti mangisursuro ken 14 nga estudyante segun iti kiddaw da, iti Sityo Dulyan, Barangay Palma Gil, Talaingod Davao del Norte idi 2018. Idi Disyembre 2018, inbasuran ti korte ti kaso a kidnapping laban kadakuada. Agsasaruno a tignay ti insayangkat dagiti nailian-demokratiko a grupo tapno kundenaren ti desisyon ti korte. Inkari ti Talaingod 18 a labanan da ti desisyon iti amin a tay-ak.

Saan a nagungon ti Makabayan iti atake. Idi Hulyo 16, indeklara ti grupo ni Gabriela Women’s Party Rep. Arlene Brosas kas maikadwa a kandidato. Ni Brosas ket pinili ti Komite ti 100 a Kababaihan manipud iti nadumaduma a sektor. Da Castro ken Brosas ket agdama a House Minority Floor Leader ken Assistant House Minority Floor Leader iti Kongreso.