![]( https://philippinerevolution.nu/wp-content/uploads/2024/07/koalisyong-makabayan.jpg )
Koalisyon nga Makabayan, magapadalagan sang 12 ka senador
Gintawag nga “Oposisyon sang Banwa,” gin-anunsyo sadtong Hulyo 10 sang Koalisyon nga Makabayan ang plano sini nga magpadalagan sang 12 ka kandidato sa pagkasenador sa eleksyon 2025. Lubos ang desisyon sang koalisyon nga magtindog bilang matuod nga oposisyon sa eleksyon nga ginadominaran sang mga paksyon sang nagahari nga sahi. Pagatiglawasan sini ang interes sang ordinaryo nga pumuluyo sa Senado.
Gindeklarar sang koalisyon nga igatib-ong sang mga makipungsodnon kag progresibo nga kandidato sini ang komprehensibo nga programang pungsodnon-demokratiko nga magasabat sa “handum sang pumuluyong Pilipino para sa kauswagan para sa kadam-an, respeto sa kinamatarung, kag lubos nga pungsodnon nga soberanya.”
Una na nga gin-anunsyo ni Rep. France Castro sadtong Hunyo 26 ang pagdalagan niya sa Senado sa idalom sang koalisyon, dala ang panawagan nga “Titser naman sa Senado.”
Duha ka semana lang pagkatapos sini, gilayon siya nga gin-atake sang estado. Ginpapanaugan sang indi makatarunganon nga husga sa kaso nga child abuse, upod si Satur Ocampo kag 11 pa ka gintawag nga Talaingod 18. Naghalin ang kaso sa pagbulig nila sa mga manunudlo kag 14 ka estudyante, sa hangyo sang mga ini, sa Sityo Dulyan, Barangay Palma Gil, Talaingod, Davao del Norte sadtong 2018. Sadtong Disyembre 2018, ginbasura na sang korte ang kaso nga kidnapping batuk sa ila. Asud-asod nga mga paghulag ang ginlunsar sang mga pungsodnon-demokratiko nga grupo para kundenaron ang husga sang korte. Pasalig sang Talaingod 18 nga pagabatuan nila ang husga sa tanan nga patag.
Wala nagpatay-og ang Makabayan sa atake. Sadtong Hulyo 16, gindeklarar sini si Gabriela Women’s Party Rep. Arlene Brosas bilang ika-duha nga kandidato. Ginpili si Brosas sang Komite sang 100 Kababainhan halin sa nagkalain-lain nga sektor. Sila ni Castro kag Brosas ang subong nga House Minority Floor Leader kag Assistant House Minority Floor Leader sa Kongreso.