Gitawag nga “Oposisyon sa Katawhan,” gipahibalo niadtong Hulyo 10 sa Koalisyong Makabayan ang ilang plano nga magpadagan og 12 ka kandidato pagkasenador sa eleksyon 2025. Lig-on ang desisyon sa koalisyon nga mobarog isip tinuod nga oposisyon sa eleksyon nga gidominahan sa mga paksyon sa nagharing hut-ong. Kini morepresentar sa interes sa ordinaryong katawhan sa Senado.

Gideklara sa koalisyon nga pasiugdahan sa makinasudnon ug progresibong mga kandidato ang kumprehensibong programang nasudnon-demokratiko nga motubag sa “tinguha sa katawhang Pilipino alang sa kalamboan para sa kadaghanan, pagtahod sa katungod, ug hingpit nga nasudnong soberanya.”

Una nang gipahibalo ni Rep. France Castro niadtong Hunyo 26 ang iyang pagdagan isip Senador ubos sa koalisyon, dala ang panawagang “Titser naman sa Senado.”

Duha ka semana lang human niini, giatake dayon siya sa estado. Gipahamtangan siya sa dili makatarunganong hukum nga sad-an sa kasong child abuse, kauban si Satur Ocampo ug 11 pa sa gitawag nga Talaingod 18. Ang kaso nagsumikad sa ilang pagtabang sa mga magtutudlo ug 14 ka estudyante sa Sityo Dulyan, Barangay Palma Gil, Talaingod Davao del Norte niadtong 2018. Niadtong Disyembre 2018, gisalikway na sa korte ang kasong kidnapping batok kanila. Sunod-sunod nga mga aksyon ang gipahigayon sa mga nasudnon-demokratikong grupo aron kundenahin ang hukum sa korte. Gisaad sa Talaingod 18 nga ilang batukan ang hukum sa tanang natad.

Wala mahadlok ang Makabayan sa atake. Niadtong Hulyo 16, gideklara niini si Gabriela Women’s Party Rep. Arlene Brosas isip ikaduhang kandidato. Gipili si Brosas sa Komite sa 100 ka Kababayen-an gikan sa lain-laing sektor. Sila Castro ug Brosas mao ang kasamtangang House Minority Floor Leader ug Assistant House Minority Floor Leader sa Kongreso.