Gintiro tubtob mapatay sang lalong-sa-druga nga mga soldado sang 2nd IB ang mag-utod nga Ronel, 22, kag Robert Monsanto, 18, sa Sityo Laray, Barangay Aguho, Esperanza, Masbate sadtong Hulyo 8. Ang mag-utod ang nagalawig sang ila sinagod nga sapat sang maagyan kag wala pagpangusisa nga ginpangtiro sang naga-operasyon nga mga soldado. Gindala sang mga soldado ang bangkay sang mag-utod sa Barangay San Roque kag didto ginpagwa nga mga Pulang hangaway nga napatay sa isa ka engkwentro. Ginbalandra sang mga ini ang mga bangkay kag ginbutangan sang mga armas kag kagamitan pang-gyera.

Pag-abdak. Gin-abdak sang mga pwersa sang estado kag wala pa sa gihapon ginpatuhaw ang lider-mangunguma nga si Melchor Luyao, katapo sang Katipunan sang Samahang Magbubukid (Kasama)-Rizal, sadtong Hulyo 9 sang gab-i sa Antipolo City. Padayon pa nga ginahibalo sang mga grupo sa tawhanon nga kinamatarung kon sa diin gindala si Luyao kag ano nga yunit sang militar ukon pulis ang nagkuha sa iya.

Pag-aresto. Duha ka tigtib-ong sang kinamatarung sang mangunguma ang iligal nga gin-aresto sang 4th IB kag pulis sa isa ka barangay sa banwa sang Bulalacao, Oriental Mindoro sadtong Hulyo 13. Ginpatuhaw sila ni Joy Laguardia kag ang iya upod duha ka adlaw matapos ang pag-aresto.

Madugay na nga social worker si Joy kag nagabulig sa mga mangunguma. Sa pihak sang pagduso sang mga himata kag mga tigpangapin sang tawhanon nga kinamatarung, wala sa gihapon ginpa-estorya ang mga gin-aresto sa ila pamilya kag pinili nga abogado.

Pagkaso sang “terorismo.” Ginpasakaan sang kaso nga “terorismo” ukon paglapas sa Anti-Terrorism Act ang duha ka lider unyonista halin sa National Capital Region nga sila ni Rodrigo Esparago kag Ed Cabuelo. Gindalahig sila sa isa ka engkwentro sang hukbo sang banwa kag militar sa barangay San Fernando Sur, Laur, Nueva Ecija sadtong Oktobre 8, 2023.