Gipusil hangtud mapatay sa mga sundalong lulong sa droga sa 2nd IB ang managsuong Ronel, 22, ug Robert Monsanto, 18, sa Sityo Laray, Barangay Aguho, Esperanza, Masbate niadtong Hulyo 8. Ang managsuon nagpatigway sa ilang mga hayop dihang nasugatan ug paturagas nga gipusil sa nag-operasyong mga sundalo.

Gidala sa mga sundalo ang mga patayng lawas sa managsuon sa Barangay San Roque ug didto gipagawas nga mga Pulang manggugubat nga napatay sa usa ka engkwentro. Gi-display nila ang mga patayng lawas ug gibutangan og mga armas ug himang iggugubat.

Pagdagit. Gidagit sa mga pwersa sa estado ug wala pa gihapon gipakita ang lider mag-uuma nga si Melchor Luyao, myembro sa Katipunan ng Samahang Magbubukid (Kasama)-Rizal, niadtong Hulyo 9 sa gabii sa Antipolo City. Kasamtangang ginausisa sa mga grupo sa tawhanong katungod kung asa gidala si Luyao ug unsang yunit sa militar o pulis ang midagit kaniya.

Pag-aresto. Duha ka mga tigpanalipud sa katungod sa mga mag-uuma ang iligal nga giaresto sa 4th IB ug pulis sa usa ka barangay sa lungsod sa Bulalacao, Oriental Mindoro niadtong Hulyo 13. Gipakita si Joy Laguardia ug ang iyang kauban duha ka adlaw human sila giaresto.

Dugay na nga social worker si Joy ug nagatabang sa mga mag-uuma. Taliwala sa pagpanghingusog sa mga paryente ug mga tigpanalipud sa tawhanong katungod, wala pa gihapon ginapaistorya ang mga giaresto sa ilang pamilya ug gipiling abogado.

Pagkaso og “terorismo.” Gipasakahan og kasong “terorismo” o paglapas sa Anti-Terrorism Act ang duha ka lider-unyonista gikan sa National Capital Region nga sila Rodrigo Esparago ug Ed Cabuelo. Gilambigit sila sa usa ka engkwentro tali sa hukbong bayan ug militar sa Barangay San Fernando Sur, Laur, Nueva Ecija niadtong Oktubre 8, 2023.