3,000 mangunguma sang tubo, nagrali sa Batangas. Sa pagpanguna sang SUGAR-Batangas, nagtipon ang 3,000 ka mangunguma sang tubo sa atubang sang upisina sang DSWD sa Batangas City sadtong Hulyo 10 para iduso ang pagpanagtag sang ayuda nga natigana para sa ila. Resulta sang hublag, ginbaton sang DSWD ang papeles sang ikalima nga bats sang mga benepisyaryo nga una sini nga ginbalibaran. Gin-aduso sang mga mangunguma ang gilayon nga pagpagwa sang ayuda.

Protesta para sa Palestine. Masobra 300 ka pamatan-on kag estudyante halin sa Baguio City ang nakigbahin sa hublag para sa Palestine sadtong Hulyo 7 sa Malcolm Square sa syudad. Nagpiket man sa atubang sang FEU ang Tamaraws for Palestine sadtong Hulyo 15 para ipahayag ang ila suporta sa pumuluyong Palestino. Ginsaway nila ang nagapadayon nga kampanyang henosidyo sang Zionista nga Israel, nga suportado sang imperyalismong US, batuk sa mga Palestino sa Gaza Strip.

Protesta batuk sa RAA. Nagpadulong sa embahada sang Japan sa Pasay City sadtong Hulyo 8 ang Bayan kag Asia-Wide Campaign against US-Japanese Domination and Aggression of Asia para kundenaron ang pagpirma sang Japan kag Pilipinas sa kasugtanan militar nga Reciprocal Access Agreement (RAA). Suno sa Bayan, ang kasugtanan ang isa ka makatalagam nga tikang kag magabunga sang ginpabaskog nga militarisasyon kag banggianay sa Asia-Pacific.

Pagtililipon kag protesta batuk sa NATO, ginlunsar sa US. Nagtipon sadtong Hulyo 7 sa Washington DC sa US ang 60 ka grupo nga anti-imperyalista sa idalom sang Resist NATO (North Atlantic Treaty Organization) para ipanawagan nga untaton na ang mga gyera sang US sa Ukraine kag iban pa nga bahin sang kalibutan, amo man ang henosidyo sini sa Palestine. Nagmartsa sila padulong sa White House. Bag-o sini, ginlunsar sang mga grupo ang Resist NATO Summit nga gintambungan sang 300 ka indibidwal. Gintuon nila ang mga ini bag-o ang pakigsinapol sang mga pungsod nga NATO sa Washington sadtong Hulyo 7-9 sa okasyon sang ika-75 nga anibersaryo sini.