NAGTAPOK NIADTONG HULYO 16 ang pipila ka iladong indibidwal ug lider sa Santo Domingo Church Compound, Quezon City alang sa usa ka diskusyon ug aron maghatod og kusog nga mensahe sa rehimen ni Marcos bahin sa panaghisgot kalinaw. Niadtong adlawa, ilang gitukod ang Council of Leaders for Peace Initiatives (CLPI) aron ihingusog ang panaghisgot kalinaw tali sa Gubyerno ng Republika ng Pilipinas (GRP) ug National Democratic Front of the Philippines (NDFP).

Ang CLPI gilangkuban sa mga akademiko, abogado, mga kanhi dekano, mga obispo ug lider sa lain-laing simbahan, ug mga nailhang tigpasiugda sa kalinaw. Nanawagan ang grupo kang Marcos Jr nga magpadayag og “tin-aw ug matinud-anong tinguha nga pasiugdahan ang malinawon ug nahiusahang solusyon sa dugay nang nagtunhay nga armadong panagbangi” sa Pilipinas. Matud pa nila, ang makatarunganong kalinaw gikinahanglan alang sa mas lambo nga kahimtang sa nasud.

Gihatagag duut sa grupo ang kakulang sa sunod nga mga lakang ug aksyon human gipagula ang Oslo Joint Statement sa GRP ug NDFP niadtong Nobyembre 23, 2023. Kini nga deklarasyon nagpakita sa plano o tinguha nga subling ablihan ang negosasyon ug iplastar ang gambalay sa pagpatuman niini.